خیبرپختونخوا کے وزیراعلیٰ سہیل آفریدی نے ریڈیوپاکستان پشاور پر9 مئی حملےکی تحقیقات کیلئے انکوائری کمیشن قائم کرنے کا اعلان کردیا۔
وزیراعلیٰ کی زیر صدارت صوبائی کابینہ کا اجلاس ہوا جس میں اہم فیصلے کیے گئے۔ اجلاس سے خطاب میں وزیراعلیٰ نے ریڈیوپاکستان پر9 مئی حملےکی تحقیقات کیلئے انکوائری کمیشن قائم کرنے کا اعلان کیا اور کہا کہ کمیشن سی سی ٹی وی سمیت تمام شواہدجمع کرکے رپورٹ کابینہ کوپیش کرے گی۔
ان کا کہنا تھاکہ سودسےپاک خیبرپختونخوا موجودہ حکومت کی اولین ترجیحات میں شامل ہے اور ہم خیبرپختونخوا کو سود کےناسور سے پاک کرنے کیلئےپالیسی بنارہے ہیں، اسلامک انویسٹمنٹ متعارف کرائیں گے۔
انہوں نے مزید کہا کہ اسمبلی کی متفقہ قراردادہےکہ بانی پی ٹی آئی اور بشریٰ بی بی سےجیل میں ناروا سلوک ہورہاہے، 4.5 کروڑ عوام کےمنتخب وزیراعلیٰ کو اپنے لیڈر سےملاقات کی اجازت نہیں دی جارہی، بانی پی ٹی آئی سے ملاقات کرکے پالیسی گائیڈلائنز لینا چاہتا ہوں، بانی پی ٹی آئی اوراہلیہ کوذاتی معالج سےملاقات کی اجازت بھی نہیں دی جارہی۔
ان کا کہنا تھاکہ حکومت کےتمام اقدامات اوراصلاحات منتخب نمائندوں کی مشاورت سے کی جائیں گی، سیاسی اختلافات اپنی جگہ امن کا حصول سب کا مشترکہ ہدف ہے، صوبائی حکومت کرپشن کےخلاف زیرو ٹالرنس پالیسی پرسختی سے عمل کرے گی، حکومتی فنڈز پر کسی کو بھی ذاتی تشہیر کی اجازت نہیں ہوگی۔
وزیراعلیٰ نے ہدایت کی کہ کابینہ اراکین تمام فیصلے میرٹ اور مکمل شفافیت کو مدنظر رکھ کر کریں، تمام قوانین عوامی مفاد میں ہونےچاہئیں، عوامی مفادکے منافی قانون کوختم کیاجائے، تمام قوانین کا ازسر نوجائزہ لیاجائے، خامیوں کی نشاندہی کرکےضروری ترامیم تجویز کی جائیں۔
Leave a Reply