ٹرمپ کا ملائیشیا جاتے ہوئے دوحہ میں مختصر قیام، امیر قطر سے جہاز میں ملاقات

فوٹو: اے ایف ہی

امریکی صدر ڈونلڈ ٹرمپ نے ملائیشیا کے دورے پر جاتے ہوئے قطر میں مختصر قیام کیا اور اس دوران امیر قطر اور وزیراعظم سے جہاز میں ملاقات کی۔

غیر ملکی خبر رساں ایجنسی کے مطابق امریکی صدر ٹرمپ نے ملائیشیا میں (ASEAN) سربراہی اجلاس میں شرکت کے لیے جاتے ہوئے قطر کے دارالحکومت دوحہ میں مختصر قیام کیا۔

امریکی صدر ڈونلڈ ٹرمپ نے جہاز میں قطر کے امیر شیخ تمیم بن حمد الثانی اور وزیراعظم شیخ محمد بن عبدالرحمٰن الثانی سے ملاقات کی۔

صدر ٹرمپ نے کہا کہ ہم نے مشرقِ وسطیٰ میں ناقابلِ یقین امن حاصل کیا ہے اور قطر نے اس میں ایک بڑا کردار ادا کیا ہے۔

فوٹو: اے ایف پی

بعد ازاں طیارے میں صحافیوں سے گفتگو کرتے ہوئے ٹرمپ نے کہا کہ انہیں صدر شی جن پنگ سے ایک بہترین ملاقات کی امید ہے، اور انہیں یقین ہے کہ چین مزید 100 فیصد ٹیرف سے بچنے کے لیے معاہدہ کرنے پر آمادہ ہو جائے گا، جو یکم نومبر سے نافذ ہونے والا ہے۔

اس کے علاوہ انہوں نے کہا کہ غزہ میں پائیدار امن ہونا چاہیے،جلدٹاسک فورس تیارہوگی، ضرورت پڑی تو قطر غزہ میں امن فوج بھیجنے کو تیار ہے۔

ٹرمپ کاکہنا تھا کہ حماس کو فوری طور پر یرغمالیوں کی لاشیں واپس کرنی چاہئییں،امریکا آئندہ 48 گھنٹوں میں صورتحال پرگہری نظررکھے گا۔

واضح رہے کہ امریکی صدر ٹرمپ ایشیا کے دورے پر ہیں جہاں چین کے صدر شی جن پنگ سے بھی ملاقات کریں گے تاکہ دنیا کی دو بڑی معیشتوں کے درمیان جاری تجارتی جنگ کے خاتمے کے لیے معاہدہ طے پا سکے۔اس کے علاوہ امریکی صدر جنوبی کوریا اور جاپان کا دورہ بھی کریں گے۔

ٹرمپ کا یہ کہنا ہے کہ وہ شمالی کوریا کے رہنما کم جونگ اُن سے ملاقات کے خواہاں ہیں۔