اسلام آباد ہائیکورٹ نے پاکستان تحریک انصاف (پی ٹی آئی) کے بانی عمران خان اور بشریٰ بی بی کی جیل میں حق زوجیت کی ادائیگی کے لیے تنہائی میں ملاقات کرانے کے لیے ایک شہری کی جانب سے دائر درخواست پر چیف کمشنر اسلام آباد، حکومت پنجاب، آئی جی جیل خانہ جات اور جیل سپرنٹنڈنٹ کونوٹس جاری کرتے ہوئے جواب طلب کر لیا۔
اسلام آباد ہائی کورٹ کے جسٹس ارباب محمد طاہر نے شہری شاہد یعقوب کی درخواست پر سماعت کی۔ درخواست گزار کے مطابق وہ بانی پی ٹی آئی کی سیاسی فلاسفی کی پیروی کرتا اور ان کا فالوور ہے، بانی پی ٹی آئی اور بشریٰ بی بی جیل میں ہیں، حق زوجیت کی ادائیگی کے لیے بانی اور بشریٰ بی بی کی جیل میں ملاقات کروائی جائے۔
درخواست میں کہا گیا ہے کہ قیدیوں کو جیل کے اندر اپنی بیوی یا شوہر سے ملاقات کا حق دیا جانا چاہیے، جیل حکام نے ملاقات کا حق چھین رکھا ہے جو بین الاقوامی قوانین اور سپریم کورٹ کے فیصلوں کے خلاف ہے۔
اسلام آباد ہائیکورٹ کےجسٹس ارباب محمد طاہر نے شہری کی درخواست پرنوٹس جاری کردیے اور چیف کمشنراسلام آباد، حکومت پنجاب، آئی جی جیل، جیل سپرنٹنڈنٹ سے جواب طلب کرلیا۔
واضح رہے کہ بانی پی ٹی آئی یا بشریٰ بی بی نا درخواست گزار اور نا ہی اس کیس میں فریق ہیں جبکہ پی ٹی آئی بھی اس درخواست سے لاتعلقی کا اظہار کر چکی ہے۔
جیل میں قید خاوند کا بیوی سے ملاقات کے لیے قانونی طریقہ کار موجود ہے جس کے مطابق قیدی میاں بیوی خود ملاقات کے لیے سپرٹینڈنٹ جیل کو درخواست کرسکتے ہیں، سپرنٹنڈنٹ جیل اجازت نہ دے تو ڈپٹی کمشنر کو درخواست دی جاتی ہے، ڈپٹی کمشنر آفس سے درخواست مسترد ہونے پر متعلقہ ٹرائل کورٹ سے اجازت لی جاسکتی ہے۔
اگر ٹرائل کورٹ بھی درخواست مسترد کر دے تو ہائیکورٹ کا فورم استعمال ہوسکتا ہے۔ ایسی ملاقات کے لیے جیل میں فیملی روم کی سہولت ہونا ضروری ہے جبکہ ذرائع کے مطابق سینٹرل جیل اڈیالہ میں میاں بیوی کی ملاقات کے لیے فیملی روم کی سہولت دستیاب ہی نہیں ہے۔
Leave a Reply