وزیردفاع خواجہ آصف کا کہنا ہے کہ قطر میں اسرائیلی حملہ امریکی کی مرضی سے ہوا، مسلم دنیا کو سمجھنا چاہیے، اپنے دوست نما دشمن میں تفریق کرلیں۔
وزیر دفاع خواجہ آصف نے جیو نیوز کے پروگرام آج شاہ زیب خانزادہ کے ساتھ میں گفتگو کرتے ہوئے کہا کہ مسلم ممالک کو نیٹو کے طرز پر اتحاد بنانا چاہیے ، مجھے مسلم ممالک کے اجلاس میں مایوسی نہیں ہوئی۔
وزیر دفاع نے کہا کہ حماس کی قیادت امریکا کی مرضی سے قطر میں بیٹھی تھی ،قطر میں اسرائیلی حملہ امریکی کی مرضی سے ہوا۔بڑا واقعہ ہے کچھ وقت لگےگا لیکن کچھ نا کچھ ہوگا۔
خواجہ آصف کا کہنا تھا کہ غلط فہمی نہیں ہونی چاہیے یہ سب کچھ امریکا کی مرضی کے ساتھ ہوا ہے ، شام میں امریکا کی مرضی سے حکومت آئی ہے اسرائیل اس پر بھی حملے سے باز نہیں آرہا، مسلم دنیا کو سمجھنا چاہیے، اپنے دوست نما دشمن میں تفریق کرلیں۔
وزیر دفاع نے کہا کہ اسامہ بن لادن امریکی پروڈکٹ تھا اس کو سوڈان سے سی آئی اے کے ڈائریکٹر لائے تھے ۔
خواجہ آصف کا کہنا تھا کہ امریکا اور مغرب میں جو رائے عامہ بن رہی ہے یہ اسرائیل کے لیے زیادہ خطرناک ہے ، امریکا اور باقی دنیا میں رائے عامہ اسرائیل کے خلاف ہورہی ہے ۔
Leave a Reply