شاہ زیب خانزادہ کا تحریر کردہ منفرد ڈرامہ ”کیس نمبر 9″بہت جلد جیو ٹی وی کی اسکرین کی زینت بنے گا

باہمت عورت کی کہانی، پاکستانی تاریخ کا منفرد ڈرامہ ”کیس نمبر 9″ ایک ایسا جرم جو روزانہ ہوتا ہے مگر ایک ایسا کیس جو آپ نے پہلے کبھی نہیں دیکھا— فوٹو: جیو انٹرٹینمنٹ

باہمت عورت کی کہانی اور پاکستانی تاریخ کا منفرد ڈرامہ ”کیس نمبر 9″ بہت جلد ”جیو ٹی وی“کی اسکرین کی زینت بنے گا۔

ایک منفرد اور معرکۃ الآراء ڈرامہ ”کیس نمبر9“ ناظرین کیلئے ایک متاثرکن کہانی لے کر آرہا ہے جس میں ایک باہمت اور نڈر لڑکی ”سحر“کے کردار کو بہت ہی منفرد انداز میں دکھایا گیا ہے۔

یہ کردار معاشرتی بندشوں کو چیلنج کرتے ہوئے دوسروں کے لیے ہمت اور مزاحمت کی علامت بن جاتا ہے۔ ڈرامے میں سحرکا کردار ادا کرنے والی فلم اور ٹیلی ویژن کی نامور اداکارہ ”صبا قمر“ ہیں جنہیں ایک خوداعتماد اور باصلاحیت لڑکی کے روپ میں دکھایا گیا ہے جبکہ ایک اور اہم کردار ”کامران“ ہے جو صف اول کے اداکار فیصل قریشی نے انجام دیا ہے، سحر طاقتور اور انا پرست بزنس مین کے سامنے جھکنے سے انکار کرتی ہے۔

کامران اپنی انا اور طاقت کے زور پر سحر کو جھکانے کی کوشش کرتا ہے لیکن کہانی سحر کے حوصلے، جدوجہد اور مزاحمت کے گرد گھومتی ہے۔

ڈرامے میں سوال اٹھایا گیا ہے کہ آیا سحر، کامران کی سازشوں کا شکار ہوگی یا پھر اپنے حوصلے اور صلاحیت کے بل بوتے پر سرخرو ہوگی۔

ڈرامے کے پروڈیوسرز عبداللہ کادوانی اور اسد قریشی ہیں جبکہ ہدایت کار سید وجاہت حسین جبکہ منفرد ڈرامہ معروف صحافی اور ”جیونیوز“کے پروگرام ”آج شاہ زیب خانزادہ کے ساتھ “ کے میزبان شاہ زیب خانزادہ کی تحریر ہے۔

شاندار کاسٹ میں صبا قمر، فیصل قریشی، جنید خان، رُشنا خان، آمنہ شیخ، شہناواز زیدی، حنا بیات، گوہر رشید، علی رحمان خان، نورالحسن، نوین وقار، زہرہ امیر، مزنا وقاص، کامران جیلانی، فائزہ گیلانی، عذرا محی الدین اور دیگر شامل ہیں۔

عورت کے ساتھ زیادتی عدالت میں شنوائی، وکلا کی بحث، اثر و رسوخ، دباؤ ، سوشل میڈیا اور میڈیا پر پروپیگنڈا اور انصاف کے حصول تک کی کہانی ”کیس نمبر 9“ کا بنیادی خیال ہے۔ ایسے کیسز میں ثبوت نہ ہونے پر نہیں بلکہ ہمت نہ ہونے پر شکست ہوتی ہے۔

”لوگ کیا کہیں گے؟“ اس ایک جملے کی وجہ سے ہزاروں خواتین خاموش ہوجاتی ہیں اور جرم پنپتا ہے اور یہی بات عورت کو انصاف سے محروم کردیتی ہے۔ ایک گفتگو میں فیصل قریشی کا کہنا تھا کہ اس ڈرامے کی آج کے دور میں شدید ضرورت ہے، میں چاہتا تھا ایسے پروجیکٹ کا حصہ بنوں جو نئی تاریخ بنادے اور لوگوں کیلئے ہمیشہ یادگار بن جائے، اس کیلئے ہم نے بہت محنت کی ہے اور یقینا یہ بہت بڑا پروجیکٹ تیار کیا ہے۔

انہوں نے مزید کہا کہ اس ڈرامے کے لیے میں نے لڑ کر اپنی ڈیٹس آگے کروائیں۔

صباقمر نے کہا کہ میں اسکرپٹ پڑھے بغیر ہاں نہیں کرتی ، یہ شاہ زیب خانزادہ کا پہلا ڈرامہ ہے مگر جب میں نے کیس 9کااسکرپٹ پڑھا تومجھے لگا کہ کسی بہت سینیئر رائٹر نے لکھا ہے۔

ڈرامہ ”کیس نمبر9“بہت جلد آپ ”جیو ٹی وی“ کی اسکرین پر دیکھ سکیں گے۔