سپریم کورٹ نے نیب کیس میں 3 سال قید کی سزا کاٹنے والے سابق ڈپٹی سیکرٹری سردارحسین کو الزامات سے بری کردیا۔
سپریم کورٹ نے 14 صفحات پر مشتمل تفصیلی فیصلہ جاری کردیا اور یہ بریت کا فیصلہ جسٹس اطہرمن اللہ کی سربراہی میں 3 رکنی بینچ نے جاری کیا۔
سپریم کورٹ کے مطابق ملزم سردارحسین قید بھگت کر رہا ہوچکے ہیں، سزا کاٹنے والے ملزم سردارحسین کیخلاف کرپشن کاکیس نہیں بنتا، بوگس چیک بنانے کا اعتراف کیشیئر کرچکا ہے۔
فیصلے میں کہا گیا ہے کہ ملزم سردارحسین کےخلاف مالی فوائد کا کوئی ثبوت پیش نہیں کیا گیا، ملزم سردارحسین کے خاندان میں بھی کسی پرمالی فوائد لینے کے شواہد نہیں لہٰذا ملزم کو الزامات سے بری کرکے ٹرائل کورٹ اور ہائیکورٹ کی سزا کالعدم قرار دی جاتی ہے۔
خیال رہے کہ سردارحسین کو کرپشن پر 2015 میں سزا سنائی گئی تھی اور سابق ڈپٹی سیکرٹری سردارحسین کو 3 سال قید اور 45 لاکھ جرمانہ ہوا تھا۔ سردارحسین نے سپریم کورٹ میں میرٹ پربریت کیلئے اپیل 2018 میں دائر کی تھی۔
Leave a Reply