پاکستان کی ٹاپ خاتون کوہ پیما نائلہ کیانی نے دنیا کی تیسری بلند ترین چوٹی کنچن جونگا کو سر کرکے ایک اور سنگ میل عبور کرلیا۔
نائلہ کیانی نے جمعرات کی شام کیمپ فور سے کینچن جونگا کی حتمی سمٹ کی جانب سفر شروع کیا تھا تاہم آج صبح 6 بجے نائلہ کینچن جونگا کے ٹاپ پر پہنچیں اور 8586 میٹر بلند کینچن جونگا کے ٹاپ پر پاکستان کا پرچم بلند کرلیا۔
کینچن جونگا بھارت اور نیپال کی سرحد پر واقع اور بھارت میں بلند ترین چوٹی ہے۔
اپنی نئی فتح پر بات کرتے ہوئےنائلہ کیانی کا کہنا تھا کہ اس کارنامہ پر فخر ہے لیکن میرا سفر ابھی ختم نہیں ہوا اور کینچن جونگا سر کرنا میرے لیے ایک ذاتی کارنامہ نہیں۔
نائلہ کیا نی کا کہنا تھا کہ یہ پاکستان کی تمام خواتین کیلئے ایک پیغام ہے، خواتین کو بتانا چاہتی ہوں کہ وہ اپنی سوچ سے بھی زیادہ مضبوط ہیں۔
کینچن جونگا کے ساتھ نائلہ کیانی نے 8 ہزار میٹر سے بلند 12 چوٹیاں سر کرلی ہیں اور نائلہ کیانی 8 ہزار میٹر سے بلند 12 چوٹیاں سر کرنے والی پاکستان کی پہلی اور واحد خاتون ہیں جن کی نظریں اب 8 ہزار میٹر سے بلند تمام چوٹیاں سر کرنے پر مرکوز ہیں۔
نائلہ کیانی کا کوہ پیمائی کیرئیر
نائلہ نے 2021 میں گیشربرم ٹو سر کرکے اپنے کوہ پیمائی کے کیرئیر کا آغاز کیا تھا، جولائی 2022 میں انہوں نے دنیا کی دوسری بلند ترین چوٹی کے ٹو کو سر کیا، اگست 2022 میں نائلہ نے گیشربرم ون جبکہ اپریل 2023 میں اناپورنا کو سرکیا۔
سال 2023 میں نائلہ نے ماؤنٹ ایوریسٹ، لوٹسے، نانگا پربت، براڈ پیک اور چو ایو کو سر کیا، مئی 2024 میں نائلہ کیانی نے دنیا کی پانچویں بلند ترین چوٹی ماؤنٹ مکالو کو سر کیا
مزید برآں نائلہ کیانی کو 8 ہزار میٹر سے بلند تمام 14 چوٹیوں کا سفر مکمل کرنے کیلئے اب شیشاپنگما اور داولاگیری سرکرنا باقی ہے۔
Leave a Reply