نیو یارک : اقوام متحدہ میں پاکستان کے مستقل مندوب عاصم افتخار کا کہنا ہے کہ جموں و کشمیر کے عوام بھارتی قبضے کے تحت منظم جبر و تشدد کا شکار ہیں، مسلح تنازعات میں شہریوں کے تحفظ کیلئے فوری عالمی اقدام ضروری ہے۔
سلامتی کونسل میں مسلح تنازعات میں شہریوں کے تحفظ سے متعلق بحث ہوئی جس سے خطاب کرتے ہوئے اقوام متحدہ میں پاکستان کے مستقل مندوب عاصم افتخار نے کہا کہ بھارت غیرقانونی طور پر کشمیر کی آبادیاتی ساخت تبدیل کرنے کی کوشش کر رہا ہے۔
عاصم افتخار نے کہا کہ جموں و کشمیر کے عوام سلامتی کونسل کی قراردادوں کے مطابق حقِ خود ارادیت کے منتظر ہیں۔مسلح تنازعات میں شہریوں کے تحفظ کیلئے فوری عالمی اقدام ضروری ہے۔
انہوں نے بتایا کہ پاک بھارت حالیہ جنگ کے دوران بھارتی حملوں میں 40 شہری شہید، 120 سے زائد زخمی ہوئے، پاکستان نے ذمہ داری کا مظاہرہ کیا اور صرف فوجی تنصیبات کو نشانہ بنایا۔
اس کے علاوہ عاصم افتخار کا کہنا تھا کہ غزہ میں اسپتالوں پر حملے پر سلامتی کونسل کو فوری ردعمل دینا چاہیے، انسانی حقوق کے قوانین پر سختی سے عمل درآمد یقینی بنایا جائے، انسانی امدادی کارکنوں اور اقوام متحدہ کے عملے کو تحفظ دیا جائے۔
Leave a Reply