60 کی دہائی میں پاکستان جن ممالک سے آگے تھا، آج وہ ہم سے آگے نکل گئے: بنگلادیشی معاون خصوصی خزانہ

بنگلا دیش کے چیف ایڈوائزر محمد یونس کے معاون خصوصی برائے خزانہ ڈاکٹر انیس الزمان نے تقریب سے خطاب میں کہا ہے کہ 60 کی دہائی میں پاکستان جن ممالک سے آگے تھا، آج وہ ہم سے آگے نکل گئے۔

قائداعظم ہاؤس میوزیم کراچی میں پاکستان اور بنگلادیش کے تعلقات کی بہتری سے متعلق تقریب “دو ممالک، ایک قوم” کے نام سے منعقد ہوئی۔

تقریب میں دفاعی تجزیہ کار اکرام سہگل، سابق گورنر سندھ ریٹائرڈ لیفٹیننٹ جنرل معین الدین حیدر اور بنگلادیش کے چیف ایڈوائزر کے معاون خصوصی برائے خزانہ ڈاکٹر اے ایس ایم انیس الزمان سمیت دیگر اہم شخصیات نے شرکت کی۔

تقریب سے خطاب میں ڈاکٹر اے ایس ایم انیس الزمان نے کہا کہ پاکستان ڈھاکا نے بنایا، مسلم لیگ ڈھاکا میں بنی، ہمارا پاکستان پر سب سے زیادہ کلیم ہے، آج قائد کے مزار پر آ کر بنگالی لکھی ہوئی دیکھی تو حیرت ہوئی۔

ان کا کہنا تھاکہ ہمیں جھوٹ سے گریز اور حقیقت کا سامنا کرنا چاہیے، 60 کی دہائی میں پاکستان بڑی ترقی کر رہا تھا، کوریا معاشی اعتبار سے بہت پیچھے تھا، آج کورین ہمارے ملک میں آ کر بتاتے ہیں کیا کیسے کرنا ہے، پہلے ہماری طرف دیکھتے تھے۔

انہوں نے مزید کہا کہ اگر ہم چاہیں تو ترقی ممکن ہے، فری ویزا تو ممکن نہیں مگر ہم کاروبار کو آسان بنانے اور فری ٹریڈ پر کام کر رہے ہیں۔

پاکستان میں بنگلا دیش کے ہائی کمشنر اقبال حسین خان نے کہا کہ دونوں ممالک کے درمیان سیاحت اور صحت سمیت زمینی اور فضائی راستے آسان کرنے پر بھی کام کر رہے ہیں۔

Source link