ویسے تو کوئی فون گم ہو جائے اور برسوں تک نہ ملے تو اس کی واپسی اور درست حالت میں واپسی کا خیال کسی کو نہیں آسکتا۔
مگر یقین کرنا مشکل ہوگا کہ ایک دہائی سے زائد عرصے تک صحرا میں رہنے والا موبائل فون ملنے کے بعد حیران کن طور پر کام کرنے لگا۔
جی ہاں واقعی امریکی ریاست ایریزونا کے علاقے Prescott میں 84 سالہ کیٹی الکین نامی خاتون اپنے گھر کے قریب صحرا میں چہل قدمی کر رہی تھیں جب انہوں نے ایک گرد آلود فون کو میدان میں دیکھا۔
وہ فون کھلا ہوا تھا اور ہر جگہ ریت چپکی ہوئی تھی۔
پہلے تو کیٹی الکین نے سوچا کہ وہ اسے پڑوس میں رہنے والے ایک لڑکے کو دے دیں جو اس طرح کی الیکٹرونکس مصنوعات لینا پسند کرتا ہے۔
مگر وہ یہ دیکھنا چاہتی تھیں کہ کیا یہ موبائل فون ابھی بھی کام کر رہا ہے یا نہیں۔
تو وہ اسے گھر لے گئیں اور پرانے چارجرز کو نکال کر دیکھا کہ کیا فون چارج ہوتا ہے یا نہیں۔
ایک چارجر فون میں لگ گیا اور وہ یہ دیکھ کر حیران رہ گئیں کہ موبائل فون چارج ہونے لگا۔
کچھ دیر بعد جب فون کو ٹرن آن کیا تو وہ کام کرنے لگا اور پھر کیٹی نے اس کے پیغامات اور کانٹیکٹس سے فون کے مالک کو تلاش کرنے کی کوشش کی۔
انہوں نے دریافت کیا کہ فون کی مالک کا نام میڈی تھا جو ایک کیفے میں کام کرنے کے ساتھ ساتھ ہائیکنگ کو پسند کرتی تھی اور شکاگو میں اس کا خاندان مقیم ہے۔
فون کے جائزے کے دوران کیٹی نے میڈی کے والد کے نمبر کو دریافت کیا اور اس پر رابطہ کرنے کی کوشش کی۔
کچھ دن کی کوشش کے بعد وہ میڈی سے بات کرنے میں کامیاب ہوگئیں۔
میڈی یہ جان کر حیران رہ گئی کہ اس کا وہ فون جو 2015 میں اس صحرا کی ہائیکنگ کے دوران گم ہوگیا تھا، دوبارہ مل گیا ہے۔
10 سال سے زائد عرصے تک یہ موبائل فون صحرا کے گرم موسم اور سخت حالات میں رہنے کے باوجود خراب نہیں ہوا بلکہ اب بھی کام کر رہا ہے۔
Leave a Reply