بھارت کی سابقہ اداکارہ گیتا بسرا نے انکشاف کیا ہے کہ انہوں نے اپنے شوہر اور سابق بھارتی اسپنر ہربھجن سنگھ سے شادی سے قبل 300 وکٹیں حاصل کرنے کی شرط رکھی تھی۔
بھارتی میڈیا کے مطابق ہربھجن سابقہ اداکارہ گیتا بسرا کا پوسٹر دیکھ کر ہی اتنے دیوانے ہوگئے تھے کہ پہلی نظر میں ہی انہیں بیوی بنانے کا فیصلہ کرلیا تاہم گیتا بسرا آخری ’ ہاں‘ سے قبل تک ہربھجن کے حوالے سے ہچکچاہٹ کا شکار رہیں حتیٰ کہ انہوں نے ہربھجن سے شادی کیلئے ایک شرط بھی رکھنے کا انکشاف کیا ہے جسے ہربھجن نے پورا بھی کیا‘۔
گیتا بسرا کی پوڈکاسٹ میں گفتگو
حال ہی میں دیے گئے ایک پوڈکاسٹ کے دوران گیتا بسرا نے انکشاف کیا کہ’میں نے ہربھجن سے شادی سے قبل ایک شرط رکھی تھی جسے پورا کرنے پر ہی ہم دونوں کی شادی ہوئی‘۔
پوڈکاسٹ کے دوران گیتا نے بتایا کہ ’ہربھجن نےمیرا ایک پوسٹر دیکھاتھا اور اسی وقت ان کو مجھ سے محبت ہوگئی، بعد ازاں ہربھجن نے یووراج سنگھ سے میرا نمبر مانگا اور مجھے میسج کردیا لیکن میں نے اس میسج کا جواب نہیں دیا کیونکہ مجھے کرکٹ یا کرکٹرز میں کوئی دلچسپی نہیں تھی‘۔
گیتا کے مطابق ’بھارت کے ورلڈکپ جیتنے کے بعد میں نے ہربھجن کو مبارکباد کے ساتھ اس میسج کا جواب دیا، بات آگے بڑھی تو ہربھجن نے پہلی ملاقات میں مجھ سے شادی کی خواہش کا اظہار کردیا، اس وقت میں 21 سال کی تھی اور بالی وڈ میں اپنے کیرئیرکی خواہشمند تھی‘ ۔
گیتا کے مطابق’ ہربھجن سے شادی کی افواہوں کے سبب 4 فلموں سے ہاتھ دھونا پڑا، آخر کار اس واقعے کے 10 ماہ بعد میں نے ہربھجن کو ایک شرط پر ’ ہاں ‘ کہہ دیا ، میں نے ہربھجن سے شادی کیلئے شرط رکھی تھی کہ جس دن وہ 300 وکٹیں حاصل کر لیں گے میں ان سے شادی کر لوں گی اور کچھ ہی دنوں میں انہوں نے 300 وکٹیں حاصل کرلیں اور اسی وقت میں نے انہیں ’ہاں‘ کہ دیا جس کے بعد ہماری شادی کی تیاریاں شروع ہوگئیں۔
واضح رہے کہ گیتا اور ہربھجن ایک دوسرے کو ڈیٹ کرنے کے کچھ عرصے بعد بلآخر 2015 میں شادی کے بندھن میں بندھ گئے تھے جوڑے کے اب دو بچے بھی ہیں۔
Leave a Reply