گوگل نے نئے اینڈرائیڈ 16 آپریٹنگ سسٹم کو متعارف کرا دیا

گوگل نے اینڈرائیڈ 16 آپریٹنگ سسٹم کو عام افراد کے لیے متعارف کرا دیا ہے اور یہ اب مخصوص اسمارٹ فونز کو دستیاب ہے۔

کمپنی کے مطابق ایسی نئی ڈیوائسز آنے والے مہینوں میں دستیاب ہوں گی جن میں یہ نیا آپریٹنگ سسٹم پہلے سے لوڈ ہوگا۔

یہ سب سے پہلے گوگل کے پکسل فونز کو دستیاب ہوگا۔

یہ پہلی بار ہے جب گوگل کی جانب سے نئے آپریٹنگ سسٹم کو جون میں متعارف کرایا گیا ہے، عموماً کمپنی کی جانب سے نیا ورژن ستمبر یا اکتوبر میں جاری کیا جاتا ہے۔

اس نئے آپریٹنگ سسٹم میں متعدد نئے فیچرز کا اضافہ کیا گیا ہے جیسے لائیو اپ ڈیٹس جس کے ذریعے آپ رائیڈ شیئرنگ گاڑیوں اور فوڈ ڈیلیوریز کو نوٹیفکیشنز میں ٹریک کرسکیں گے۔

اسی طرح نئے ڈیوائس سکیورٹی فیچرز اور دیگر متعدد اپ ڈیٹس کی گئی ہیں۔

اس نئے آپریٹنگ سسٹم کے چند اہم فیچرز کی تفصیلات درج ذیل ہیں۔

لائیو اپ ڈیٹس اینڈ اسٹریم لائن نوٹیفکیشنز

اگر آپ فوڈ ڈیلیوری کے منتظر ہیں یا رائیڈ شیئرنگ سواری کا انتظار کر رے ہیں، تو آپ کے فون کی لاک اسکرین پر ہی لائیو اپ ڈیٹس کو دیکھنا ممکن ہو جائے گا۔

اس طرح صارفین کو کسی ایپ کو اوپن کرنے کی ضرورت نہیں ہوگی، جبکہ اس ایپ کے نوٹیفکیشنز خودکار طور پر اکٹھے ہو جائیں گے، جس سے لاک اسکرین بے ہنگم محسوس نہیں ہوگی۔

ون ٹیپ ایڈوانسڈ پروٹیکیشنز

گوگل کی جانب سے اینڈرائیڈ ڈیوائسز کے دفاع کو مضبوط بنایا جا رہا ہے۔

اس مقصد کے لیے ایڈوانسڈ پروٹیکیشن کو اینڈرائیڈ 16 میں تمام صارفین کے لیے مفت متعارف کرایا جا رہا ہے جس سے انہیں فراڈ کالز اور دیگر آن لائن حملوں سے بچنے میں مدد ملے گی۔

کیمرا فیچرز

گوگل نے آٹو میٹک نائٹ موڈ سین ڈیٹیکشن، ہائیبرڈ آٹو ایکسپوزر اور متعدد دیگر فیچرز اینڈرائیڈ ڈیوائسز کے کیمرا سیٹ اپ کے لیے اینڈرائیڈ 16 کا حصہ بنائے ہیں۔