گریٹر اسرائیل کے تصور سے متعلق تاریخی اور روحانی مشن پر ہوں: نیتن یاہو

عرب ممالک سے بے گھر فلسطینیوں کو پناہ دینے سے متعلق بات چیت ہورہی ہے، اسرائیلی وزیراعظم—فوٹو: فائل

اسرائیلی وزیراعظم نیتن یاہو نے کہا ہے کہ وہ گریٹر اسرائيل کے نظریے میں بہت زیادہ دلچسپی رکھتے ہیں اور اس حوالے سے وہ ایک تاریخی اور روحانی مشن پر ہیں۔

انہوں نے یہ بات حال ہی میں اسرائیلی میڈیا کو دیے گئے ایک انٹریو کے دوران کہی۔

نیتن یاہو سے اینکر نے سوال کیاکہ کیا وہ گریٹر اسرائیل کے تصور سے خود کو جڑا ہوا محسوس کرتے ہیں تو اسرائیلی وزیراعظم نیتن یاہو نے جواب دیا کہ ’بہت زیادہ، وہ گریٹر اسرائیل کے تصور سے بہت زیادہ جڑے ہوئے ہیں’۔

ٹائمز آف اسرائیل کے مطابق نیتن یاہو کا کہنا تھا کہ گریٹر اسرائیل کے اس تصور میں فلسطینی علاقوں کے علاوہ اردن اور مصر کے بھی کچھ حصے شامل ہوں گے۔

اسرائیلی وزیراعظم نے یہ بھی کہا ہےکہ اُن کی کئی عرب ممالک سے بے گھر فلسطینیوں کو پناہ دینے سے متعلق بات چیت ہورہی ہے تاہم نیتن یاہو نے اپنی گفتگو کے دوران ان ممالک کے نام ظاہر نہیں کیے۔

دوسری جانب عرب ممالک نے نیتن یاہو کے گریٹر اسرائیل سے متعلق بیان کو مسترد کردیا۔

سعودی وزارت خارجہ نے ایک بیان میں کہا کہ سعودی عرب اسرائیلی قابض حکام کی طرف سے اختیار کیے گئے آباد کاری اور توسیع پسندانہ منصوبوں کو یکسر مسترد کرتا ہے۔

اردن نے نیتن یاہو کا بیان علاقے کی خودمختاری کے لیے سنگین خطرہ قرار دیا ہے۔

مصر نے اسرائیل سے نیتن یاہو کے بیان پر وضاحت طلب کرنے کا مطالبہ کیا ہے۔ مصرکی وزارت خارجہ نے کہا ہےکہ اسرائیلی وزیراعظم کا بیان خطے میں امن کے خلاف ہے۔

عرب لیگ نے نیتن یاہو کے بیان پر رد عمل دیتے ہوئےکہا کہ یہ بیانات عرب ممالک کی سلامتی کے لیے ایک سنگین خطرہ اور بین الاقوامی قوانین کے لیے ایک کھلا چیلنج ہے۔

عرب لیگ کی جانب سے جاری بیان میں کہا گیا ہے کہ یہ بیان جارحانہ عزائم کی عکاسی کرتے ہیں جنہیں برداشت نہیں کیا جا سکتا۔

ادھر یمن کی وزارت خارجہ نے ایک بیان میں نیتن یاہو کے بیان کو بین الاقوامی قانون کی کھلم کھلا خلاف ورزی قرار دیدیا۔ یمن نے خبردار کیا ہے کہ ان اسرائیلی پالیسیوں کا تسلسل خطے کو مزید کشیدگی کی طرف لے جائے گی۔

یاد رہےکہ چند ماہ قبل اسرائیل کی صیہونی حکومت نےگریٹر اسرائیل کا نقشہ جاری کیا تھا اور اس نقشے میں مقبوضہ فلسطینی علاقوں کے علاوہ اردن، شام، لبنان اور دیگر عرب ممالک کو صیہونی ریاست کا حصہ دکھایا گیا تھا۔