جون کی دہکتی گرمی جھیلنے کے بعد ٹھنڈے پانی سے نہانے کا بھی اپنا ہی مزہ ہے لیکن اس کے باوجود بھی اکثر لوگ طبی فوائد کے تحت نیم گرم پانی سے نہانے کو ہی ترجیح دیتے ہیں۔
لیکن کیا آپ جانتے ہیں کہ ماہرین نیم گرم پانی کے ساتھ ساتھ ٹھنڈے پانی سے نہانے کے فوائد کو بھی تسلیم کرتے ہیں؟
طبی ماہرین کے مطابق خصوصاً ورزش کے بعد ٹھنڈے پانی سے نہانا آپ کو پرسکون، صحتیاب، حتیٰ کہ جسمانی طور پر بھی اچھا محسوس کروانے کیلئے بطور علاج کام کرسکتا ہے۔
عام نزلہ زکام کے خلاف قوت مدافعت بڑھائے
چند منٹ تک ٹھنڈے پانی سے لیا گیا شاور وائٹ بلڈ سیلز کی پیداوار کو بڑھا کر آپ کے مدافعتی نظام کو انفیکشن اور بیماریوں کے خلاف لڑنے میں مدد فراہم کرتا ہے۔
نیدرلینڈز میں کی گئی ایک تحقیق کے مطابق ایسے افراد جنہوں نے 90 دن تک 30، 60 یا 90 سیکنڈ تک ٹھنڈے پانی سے شاور لیا وہ ٹھنڈے پانی سے نہ نہانے والے افراد کے مقابلے 29 فیصد کم بیمار پڑے۔
ڈپریشن سے نجات
ایک طبی مطالعہ میں شریک وہ شرکا جو کئی ماہ تک روزانہ ٹھنڈے پانی سے نہائے ان میں ڈپریشن کی علامات میں کمی رپورٹ کی گئی۔
ایک اور تحقیق سے پتا چلتا ہے کہ ٹھنڈا پانی انسانی مزاج کو خوشگوار کرسکتا ہے اور اس کی بے چینی کو کم کردیتا ہے۔
میٹابولزم میں اضافہ
انسانی جسم ٹھنڈے پانی سے نہانے کے دوران گرم رہنے کی کوشش میں توانائی کااخراج کرتا ہے نتیجتاً کیلوریز ( معمولی مقدار میں )کم ہوجاتی ہیں اور میٹابولزم میں اضافہ ہوسکتا ہے۔
سوزش کم اور پٹھوں کے درد کو ختم کردیتا ہے
ٹھنڈا پانی شریانوں کو سکڑنے میں مدددیتا ہے، اس عمل کے دوران خون قدرتی طور پر آکسیجن اور غذائیت سے بھرپور ہو جاتا ہے، جیسے جیسے آپ کا جسم دوبارہ گرم ہوتا ہے، خون کی نالیاں پھیلتی ہیں اور آکسیجن والے خون کو آپ کے ٹشوز میں واپس لے آتی ہیں، یہ عمل آپ کے جسم کی سوزش کو دور کرنے اور پٹھوں کے درد کو کم کرنے میں بھی مدد دیتا ہے۔
جلد اور بالوں کی صحت کیلئے مفید
ٹھنڈا پانی انسانی جلد کو ٹائٹ رکھنے اور کیل مہاسوں کو ختم کرنے میں معاون ہے۔
سائنسی ماہرین کے مطابق ٹھنڈے پانی سے نہانے سے بالوں کی صحت بھی اچھی ہوجاتی ہے اور بال چمکدار اور صحت مند ہوجاتے ہیں۔
Leave a Reply