کراچی کے علاقے کورنگی زمان ٹاؤن میں بزرگ شہری حفاظتی دیوار نہ ہونے کے باعث نالے میں گر کر جاں بحق ہوگئے۔
ریسکیو ذرائع کے مطابق بزرگ شہری کورنگی کبڈی گراؤنڈکے قریب نالے میں گرکر جاں بحق ہوئے، بزرگ شہری اندھیرے میں اپنی سائیکل پر سامان لاد کر پیدل چل رہے تھےکہ اچانک نالے میں جاگرے۔
واقعہ گزشتہ شام ساڑھے 6 بجے پیش آیا، واقعےکی سی سی ٹی وی بھی سامنے آئی ہے۔
پولیس کے مطابق جاں بحق شخص کی شناخت کالے خاں کے نام سے ہوئی ہے، متوفی زمان ٹاؤن سیکٹر 34 تھری کے رہائشی تھے۔
پولیس کا کہنا ہےکہ ابتدائی معلومات کے مطابق نالےکے اطراف حفاظتی دیوار نہ ہونے کے باعث حادثہ پیش آیا۔
پولیس کے مطابق کالے خاں کرائے کے مکان میں بچوں کے ہمراہ رہائش پذیر تھے، متوفی کی دو بیٹیاں اور دو بیٹے ہیں۔
بزرگ شہری کی نماز جنازہ ادا کردی گئی ہے اور ان کی تدفین علاقائی قبرستان میں کی گئی ہے۔
دوسری جانب علاقہ مکینوں کے مطابق نابینا اور خصوصی بچوں کے سینٹر اور اسکول کے سامنے موجود نالے کی حفاظتی دیوار نا ہونےکی متعدد بار متعلقہ اداروں کو شکایات کی گئیں تاہم اس کے باوجود صفائی اور حفاظتی اقدامات نہیں کیے گئے۔
Leave a Reply