دنیا بھر میں مشہور سلطنت عثمانیہ پر بننے والی ترک ڈرامہ سیریز ’ارطغرل غازی‘ کے سیکوئل ’کورلوش عثمان‘ کے مرکزی کردار براق اوزچیویت ( عثمان بے ) نے سیریز کو الوداع کہہ دیا۔
ترکش میڈیا رپورٹس کے مطابق سیریز کے مرکزی اداکار براق اوزچیویت نے نئے سیزن کے لیے فی قسط 4 ملین (40 لاکھ) ترک لیرا کا مطالبہ کیا تھا۔
رپورٹس کے مطابق اس مطالبےکے بعد ڈائریکشن ٹیم اور براق اوزچیویت کے درمیان اختلافات سامنے آئے حتیٰ کہ دونوں فریقین نے ایک دوسرے کو سوشل میڈیا پر بھی ان فولو کردیا تھا۔
تاہم اب براق اوزچیویت نے انسٹاگرام پر شیئر کی گئی ایک اسٹوری میں سیریز چھوڑنے کا اعلان کردیا ہے۔
براق اوزچیویت نے انسٹاگرام پر شیئر کی گئی اسٹوری میں لکھا کہ’الوداع کہنا ایک عظیم خوبی ہے‘، ترکش اداکار نے شیئر کی گئی اسٹوری میں ناظرین کی جانب سے ملنے والی پذیرائی پر دل کی گہرائیوں سے ان کا شکریہ بھی اداکیا۔
فی الحال پروڈکشن ٹیم کی جانب سے براق اوزچیویت کے متبادل ’عثمان بے ‘کے کردار کیلئے کسی اداکار کا نام سامنے نہیں آیا ہے۔
واضح رہے کہ براق اوزچیویت نے کورلوش عثمان کے6 سیزن میں ’ عثمان بے ‘ کا کردار بخوبی نبھایا ہے، دوسری جانب براق اوزچیویت کو ترکیے کے مہنگے ترین اداکاروں میں شامل کیا جاتا ہے۔
رپورٹس کے مطابق براق اوزچیویت اس سے قبل کورلوش عثمان کی فی قسط 40 ہزار یورو معاوضہ لے رہے تھے جبکہ دیگر کاسٹ کا فی قسط معاوضہ 15000 سے 30000 یورو ہے۔
Leave a Reply