بھارت کے معروف گلوکار کمار سانو سابقہ اہلیہ ریٹا بھٹاچاریہ کی جانب سے لگائے گئے الزامات کے سبب سرخیوں کی زینت بن گئے۔
کمار سانو کی ریٹا بھٹا چاریہ سے شادی اور علیحدگی
بھارتی میڈیا کے مطابق کمار سانو نے 1986 میں ریٹا بھٹاچاریہ سے شادی کی تھی، اس جوڑے کے 3 بچے ہیں۔
تاہم 1994 میں اداکارہ کنیکا سدانند کے ساتھ کمار سانو کے تعلقات منظر عام پر آنے کے بعد جوڑے کے درمیان علیحدگی ہوگئی تھی اور بچوں کو ریٹا کی کسٹڈی میں دیا گیا تھا۔
سابقہ اہلیہ کے الزامات
علیحدگی کو کئی دہائیاں گزرجانے کے باوجود حال ہی میں ریٹا بھٹا چاریہ نے سابق شوہر پرالزامات کی بوچھاڑ کردی۔
بھارتی میڈیا کو دیے گئے ایک انٹرویو میں کمار سانو کی سابقہ اہلیہ نے اپنی شادی کے دوران کمار سانو کی جانب سے اپنائے گئے برے رویے کا پردہ فاش کردیا۔
شہرت ملتے ہی نہ صرف مجھے چھوڑ دیا بلکہ میری تذلیل بھی کی: سابقہ اہلیہ
کمار سانو کی سابقہ اہلیہ ریٹا نے دعویٰ کیا کہ ’میں نے کمار سانو کے کیرئیر کی تشکیل میں اہم کردار ادا کیا لیکن انہوں نے شہرت ملتے ہی مجھے نہ صرف چھوڑ دیا بلکہ میری تذلیل بھی کی،اسے انسان کہنا بھی غلط ہوگا‘۔
سابقہ اہلیہ ریٹا کے مطابق ’کمار سانو اگرچہ بھارت کے معروف گلوکار ہیں لیکن وہ گلوکاری کے حوالے سے کبھی بھی پرجوش نہیں تھے، انہیں گلوکار بنتے دیکھنا میرا خواب تھا اور میں نے ہی ان کی حوصلہ افزائی کی ‘۔
ممبئی میں کمار سانو کے ہمراہ ا پنے ابتدائی دنوں کی مشکلات کو یاد کرتے ہوئے ریٹا نے بتایا کہ ’جب ہم ممبئی آئے تو ہمارے پاس پیسے اور گاڑی بھی نہیں تھی، ہم بالکل خالی تھے، اس وقت وہ لنگی پہنتا تھا اور ہم پنکھے کے بغیر فرش پر سوتے تھے‘۔
ریٹا نے دعویٰ کیا کہ ’فلم عاشقی کی زبردست کامیابی کے بعد کمار سانو کا رویہ بدلنا شروع ہوگیا وہ بد اخلاق ہوگیا، اس نے مجھے بلاک کردیا اور خود کو اپنے خاندان سے دور کر لیا، انہیں اچھا لگتا تھا کہ ان کی زندگی کو میڈیا پر ڈسکس کیا جائے پھر چاہے وہ مثبت ہو یامنفی ‘۔
مجھے دوران حمل پیٹ بھر کر کھانا بھی نہیں دیا جاتا تھا: ریٹا بھٹاچاریہ
ریٹا نے بتایا کہ ’میرے تیسرے حمل کے دوران کمار سانو اور ان کے اہل خانہ کی جانب سے مجھے شدید بدسلوکی برداشت کرنا پڑی، مجھے دوران حمل پیٹ بھر کر کھانا بھی نہیں دیا جاتا تھا، ایک مرتبہ کمار سانو نے مجھے کچن کے اسٹوریج میں بند کردیا اور خود باہر چلے گئے، اس کے بعد میں نے چوکیدار سے چاول منگواکر پکائے ، انہوں نے میرے بچوں کے لیے دودھ خرید کردینا بھی بند کردیا، ڈاکٹرز کو کہہ دیا کہ ہم آپ کے پیسے نہیں دیں گے‘۔
سابقہ اہلیہ نے مزید بتایا کہ ’میں نے اس وقت اپنے والد کو بھی کھو دیا جس کے بعد مجھ پر ٹارچر کی حدیں پار ہوگئیں، اس وقت سانو خود تو لیجنڈ بن گیا لیکن مجھے حمل کے دوران عدالت تک لے گیا، اسی دوران اس کا افیئر بھی ہوا ‘ ۔
Leave a Reply