امیر جماعت اسلامی کراچی منعم ظفر کا کہنا ہے کہ پیپلز پارٹی کی 17 سال کی کرپشن نے شہر کو تباہ حال کر دیا، کراچی کا کوئی پرسان حال نہیں، پورے شہر کا حال گٹر جیسا ہوگیا ہے۔
ادارہ نور حق میں پریس کانفرنس کرتے ہوئے منعم ظفر کا کہنا ہے کراچی شہر کا انفرا اسٹرکچر تباہ حال ہے، واٹر کارپوریشن کا حال بھی سب کے سامنے ہے، کراچی میں شہری حادثات در حادثات کا شکار ہیں، پیپلز پارٹی کی 17 سال کی کرپشن نے شہر کو تباہ حال کر دیا، اس شہر کا کوئی پرسان حال نہیں ہے، پورے شہر کا حال گٹر جیسا ہو گیا ہے۔
منعم ظفر نے کہا کہ ان کا کوئی منصوبہ وقت پر مکمل ہی نہیں ہوتا، کریم آباد انڈر پاس تاحال مکمل نہیں ہوا، ملیر چوک سے ٹینک چوک تک سڑک تباہ حال ہے، انڈر پاس کے نام پر گلستان جوہر پر لوگوں کو پریشان کیا ہوا ہے، جہانگیر روڈ مرتضیٰ وہاب پر کلنلک کا ٹیکا ہے، حکمران شہریوں کی کوئی بات نہیں سنتے، صوبائی حکومت کے صرف دعوے نظر آتے ہیں۔
ان کا کہنا تھا آپ نہ کراچی والوں کو اور نہ بلدیاتی اداروں کو اختیار دیتے ہیں، آپ 18 ویں ترمیم کے بعد بھی وسائل دینے کو تیار نہیں ہیں، یہ ہے ان کی جمہوریت، آپ کا بجٹ 18ویں ترمیم کے بعد 8 گناہ بڑھ گیا ہے، کراچی کو 2018 میں بھی اتنے ہی پیسے ملتے تھے جتنے آج۔
امیر جماعت اسلامی کراچی کا کہنا تھا مئیر کراچی کے ترقیاتی کام کے 60 دن کب شروع ہوں گے، کے ایم سی کے الیکٹرک کے بلوں میں ٹیکس لگا کر اب تک 4 ارب سے زائد وصول کر چکی ہے، واٹر کارپوریشن مرتضیٰ وہاب کے ماتحت ہے، اس سال 24 افراد گٹر میں گر کر جاں بحق ہوئے ہیں۔
انہوں نے کہا کہ شہر میں بسوں کے صرف اعلانات ہیں، کب آئیں گی یہ بسیں؟ 300 بسیں ہیں، 100 بی آر ٹی کی بھی ملا لیں تو 400 ہو جاتی ہیں لیکن شہر کی آبادی ساڑھے 3 کروڑ ہے، شرجیل میمن کی جانب سے ہر چند روز میں اعلانات کیے جاتے ہیں، نہ مرتضیٰ وہاب کے 60 دن مکمل ہو رہے ہیں نہ شرجیل میمن کا ہفتہ پورا ہونے کا نام لے رہا ہے۔
منعم ظفر کا کہنا تھا شہر میں موٹر سائیکل پر لاکھوں لوگ سفر کرتے ہیں، 250 سے زائد واقعات میں ہیوی ٹریفک سے لوگ کچل دیئے گئے لیکن کوئی پوچھنے والا ہی نہیں ہے۔
Leave a Reply