ملک کےمختلف شہروں میں کہیں ہلکی کہیں تیز بارش ہوئی جس کے باعث سردی کی شدت میں اضافہ ہوگیا۔
شہر قائد میں موسم سرما کی پہلی بارش کا آغاز ہوگیا، رات گئے آئی آئی چندریگر روڈ، پی آئی ڈی سی، سلطان آباد، ضیاء الدین احمد روڈ، سول لائنز میں بادل برس پڑے۔
شاہراہ فیصل، طارق روڈ، صدر، سولجر بازار، جمشیدروڈ اور اطراف کے علاقوں میں بھی ابر کرم برس پڑا، سائٹ ایریا، میٹروول، اورنگی ٹاؤن میں بھی کہیں ہلکی کہیں تیز بارش ہوئی۔ آج کم سے کم درجہ حرارت 16 ڈگری سینٹی گریڈ ریکارڈ کیاگیا۔
محکمہ موسمیات کا کہنا ہے کہ اب شہر میں مزید بارش کا امکان نہیں ، تاہم صبح میں ہلکی پھوار پڑسکتی ہے۔
ادھر حیدر آباد اور جامشورو میں بھی موسلادھار بارش ہوئی جبکہ دادو، جیکب آباد،لاڑکانہ میں بھی بادل برسے۔
دوسری جانب کوئٹہ اورگردونواح میں بارش ہوئی جس کے باعث 40 سے زائدفیڈرز بند کردیے گئے۔ کوئٹہ کی سمنگلی روڈ، اسپنی روڈ بروری، مغربی باس پاس اندھیر ے میں ڈوب گیا۔ لسبیلہ اور وندر میں بھی بارش ہوئی۔
ادھر پشاور، بنوں، کرک میں بھی بادل برسے، خیبرپختونخوا میں بارش کا سلسلہ آئندہ چند روز تک جاری رہنے کا امکان ہے۔ لاہور، راولپنڈی، فیصل آباد سمیت پنجاب کے مختلف اضلاع میں بھی آج بارش کی پیشگوئی کی گئی ہے۔
چلاس شہر و گردونواح میں گزشتہ رات سے وقفے وقفے سے بارش کا سلسلہ جاری ہے ، بالائی وادیوں کی رابطہ سڑکیں بند ہو چکی ہیں۔
Leave a Reply