کراچی میں شہری پر تشدد میں ملوث ملزم سلمان فاروقی کو عدالت میں پیشی کے موقع پر وکیل نے تھپڑ ماردیا۔
کراچی کے علاقے ڈیفنس اتحاد کمرشل میں نوجوان پر تشدد کے کیس میں نامزد ملزمان اویس ہاشمی اور سلمان فاروقی کو جوڈیشل مجسٹریٹ جنوبی کی عدالت میں پیش کیا گیا۔
عدالت نے ملزم سلمان فاروقی سے سوال کیا کہ آپ کا وکیل کون ہے؟ ملزم نے کہا کہ میرے وکیل نعیم قریشی ہیں۔ عدالت نے ملزم کو اپنے وکیل کو بلانے کی ہدایت کی جس کے بعد سماعت دس منٹ کیلئے ملتوی کردی۔ وقفے کے بعد گذری تھانہ کی پولیس نے دونوں ملزمان کو دوبارہ عدالت میں پیش کیا۔
ملزم سلمان فاروقی کی جانب سے درخواست ضمانت دائر کردی گئی۔ عدالتی عملے نے ملزمان کی درخواست ضمانت اعتراض لگاکر واپس کردی۔ عدالتی عملہ کا کہنا تھا کہ ملزمان کے خلاف لگائی دفعات سیشن ٹرائل کی بنتی ہیں لہٰذا ملزمان کی ضمانت کیلئے سیشن کورٹ سے رجوع کیا جائے۔
عدالت نے سلمان فاروقی سمیت دونوں ملزمان کو دو روزہ جسمانی ریمانڈ پر پولیس کے حوالے کردیا۔
پولیس جب ملزمان کو عدالت سے لے کر روانہ ہوئی تو اسی دوران وکلا اور وہاں موجود لوگوں نے ملزمان کو گھیرلیا اور مارو مارو کے نعرے لگائے۔
سلمان فاروقی کو وکیل نے تھپڑ ماردیا۔
پولیس اہلکاروں نے ملزمان کی دوڑیں لگوائیں اور گاڑی میں لے کر تھانے روانہ ہوگئے۔
Leave a Reply