اسلام آباد:پاکستان تحریک انصاف کے وفد کی جمعیت علمائے اسلام کے سربراہ مولانا فضل الرحمان سے ملاقات ہوئی ہے جس میں محمود خان اچکزئی کے بطور اپوزیشن لیڈر نامزدگی پر اتفاق کیا گیا۔
پی ٹی آئی کا وفد اسلام آباد میں مولانا فضل الرحمان کی رہائش گاہ پہنچا، وفد میں سابق اسپیکر اسد قیصر، صوبائی صدر جنید اکبر،شہرام ترکئی شامل تھے
ملاقات میں جے یو آئی کے مولانا صلاح الدین ایوبی، جلال الدین ایڈووکیٹ، مولانا اسجد محمود بھی شریک ہوئے۔
جے یو آئی کے اعلامیے کے مطابق ملاقات میں ملکی سیاسی اور خطے کی صورتحال پر گفتگو ہوئی۔
پی ٹی آئی وفد نے خیبرپختونخواہ میں پی ٹی آئی کے قومی جرگہ کی تجویز پر مولانا فضل الرحمان سے مشاورت کی۔ مولانا فضل الرحمان نے قومی جرگہ کی تجویز کا خیر مقدم کیا۔
اعلامیے کے مطابق پی ٹی آئی وفد نے مولانا فضل الرحمان سے پارلیمنٹ میں اپوزیشن کو متحد کرنے کے لیے کردار ادا کرنے کی اپیل کی۔ ملاقات میں محمود خان اچکزئی کے بطور اپوزیشن لیڈر نامزدگی پر بھی اتفاق کیا گیا۔
جے یو آئی کے اعلامیے میں کہا گیا کہ پی ٹی آئی وفد نے کے پی اسمبلی سے سینیٹ کی خالی نشست پر جے یو آئی سے تعاون کی درخواست کی۔
Leave a Reply