عالمی ایٹمی توانائی ایجنسی (آئی اے ای اے) کے ڈائریکٹر جنرل رافائل ماریانو گروسی نے کہا ہے کہ پاکستان کا نیوکلیئر پاور پروگرام اچھی رفتار سے آگے بڑھ رہا ہے۔
ویانا میں عالمی ایٹمی توانائی ایجنسی (آئی اے ای اے) 69 ویں جنرل کانفرنس میں ڈی جی آئی اے ای اے اور چیئرمین پاکستان اٹامک انرجی کمیشن (پی اے ای سی) ڈاکٹر راجہ علی رضا انور کے درمیان ملاقات ہوئی۔
ملاقات میں مختلف پروگراموں کے تحت دو طرفہ تعاون کے شعبوں کا جائزہ لیا گیا۔
چیئرمین پی اے ای سی نے پُرامن جوہری ٹیکنالوجی کے استعمال کےلیے پاکستان کے عزم کا اعادہ کیا اور کہاکہ پاکستان کا پُرامن جوہری پروگرام قومی ترقیاتی ترجیحات اور آئی اے ای اے کے فریم ورک کے عین مطابق ہے۔
ان کا کہنا تھاکہ پاکستان کے جوہری پاور پلانٹس اعلیٰ ترین حفاظتی معیارات کے تحت چلائے جا رہے ہیں۔
ڈی جی عالمی ایٹمی توانائی ایجنسی نے پاکستان کے آئی اے ای اے سے قریبی تعاون کی تعریف کی اور کہا کہ چشمہ نیوکلیئر پاور پلانٹ سی 5 پاکستان کے توانائی کے تحفظ کےلیے اہم سنگِ میل ہے۔
ان کا کہنا تھاکہ پاکستان کا نیوکلیئر پاور پروگرام ”اچھی رفتار سے آگے بڑھ رہا ہے“ اور پُرامن مقاصد کے لیے جوہری سائنس و ٹیکنالوجی کے استعمال میں پاکستان اہم شراکت دار ہے۔
Leave a Reply