عالمی بینک نے پاکستان میں حالیہ سیلاب سے معیشت پر پڑنے والے اثر سے مہنگائی میں اضافے کا خدشہ ظاہر کیا ہے۔
پاکستان کی معیشت پر عالمی بینک نے رپورٹ جاری کردی جس میں کہا گیا ہےکہ حالیہ سیلابی تباہی سے معیشت پر شدید منفی اثر پڑا ہے جس کے باعث مہنگائی 7.2 فیصد تک پہنچنے کا امکان ہے۔
رپورٹ میں مزید کہا گیا ہےکہ سیلاب کی وجہ سے انفرا اسٹرکچر کی جلد از جلد بحالی ضروری ہے، بارشوں سے نقصانات کے سبب عوامی خدمات متاثر ہو سکتی ہیں اور بارش سے ہونے والے نقصان سے بجٹ پر اضافی دباؤ آئے گا۔
عالمی بینک کا کہنا ہےکہ پنجاب میں زرعی پیداوار میں کم از کم 10فیصد کمی ہوگی، بارشوں سے چاول، گنا، کپاس، گندم اور مکئی کی کاشت شدید متاثر ہوئیں۔
رپورٹ کے مطابق اگلے مالی سال پاکستان کی شرح نمو 3.4 فیصد تک بحال ہونے کا امکان ہے اور رواں سال پاکستان کی شرح نمو 2.6 فیصد رہنے کا امکان ہے جب کہ سیلاب سے مہنگائی 7.2 فیصد تک پہنچ سکتی ہے۔
عالمی بینک کی رپورٹ میں اس بات کا بھی تذکرہ کیا گیا ہےکہ زرعی پیداوار میں بہتری، افراط زراورشرح سود میں کمی ترقی میں مددگار ثابت ہو سکتے ہیں، ٹیرف ریفارمز سے برآمدات اور نمو میں ممکنہ اضافہ متوقع ہے۔
رپورٹ کے مطابق رواں مالی سال میں افراط زر سنگل ڈیجٹ ہونے کے باوجود خطرات برقرار ہیں جب کہ سیلاب کی وجہ سے 2027 تک افراطِ زر میں اضافے کا خدشہ ہے۔
Leave a Reply