پاکستان سپر لیگ( پی ایس ایل) کے 11 ویں ایڈیشن کیلئے پلیئرز آکشن متعارف کرانے کا فیصلہ کیا گیا ہے۔
ذرائع کے مطابق پی ایس ایل گورننگ کونسل کی ورکنگ کمیٹی کے رات گئے اجلاس میں اہم فیصلے کیے گئے ہیں۔
ذرائع کا کہنا ہے کہ پی ایس ایل گورننگ کونسل کی ورکنگ کمیٹی میں آکشن ڈرافٹ اور ری ٹینشن کے معاملات پر بحث ہوئی اور پاکستان سپر لیگ میں پلیئرز آکشن متعارف کرانے کا فیصلہ کیا گیا۔
ذرائع کے مطابق پی ایس ایل 11 کے لیے کھلاڑیوں کی ری ٹینشن کے حوالے سے بھی فیصلہ ہو گیا۔
ذرائع کے مطابق پی ایس ایل چیمپئن لاہور قلندرز نے پلیئرز آکشن کے حق میں ووٹ دیا ۔اس کے علاوہ کوئٹہ گلیڈی ایٹرز ، اسلام آباد یونائیٹڈ ، کراچی کنگز اور حیدر آباد نے بھی آکشن کے حق میں ووٹ دیا ۔
ذرائع کا کہنا ہے کہ 5 پرانی فرنچائزز نے 4 ری ٹینشن پر اتفاق کیا ان میں ایک برانڈ ایمبیسڈر ہو گا۔ 5 ری ٹینشن ہر کیٹیگری میں ایک ایک ہوگی، ایک پلیئر کو نچلی کیٹیگری میں لا کر برانڈ ایمبیسڈر بنایا جا سکے گا۔
ذرائع کے مطابق نئی فرنچائزز باقی پلیئرز پول سے اسی طرح کھلاڑیوں کا انتخاب کر لیں گی۔ باقی پلیئرز پول کا آکشن ہوگا اور فرنچائزز کھلاڑی آکشن میں اٹھائیں گی۔
ذرائع کا کہنا ہے کہ 2 نئی فرنچائزز نے زیرو ری ٹینشن پر زور دیا۔
ذرائع کا کہنا ہے کہ ورکنگ کمیٹی کے فیصلوں کی حتمی منظوری چیئرمین پی سی بی محسن نقوی دیں گے۔ ضرورت پڑنے پر گورننگ کونسل کا اجلاس طلب کیا جا سکے گا۔
ذرائع کے مطابق پی ایس ایل کے آکشن اور ری ٹینشن کا فارمولا چیئرمین محسن نقوی کو بھجوایا جائے گا اور اگلے ایک 2 روز میں اس کا با قاعدہ اعلان ہو گا ۔
Leave a Reply