پاکستان اور مصر کے درمیان سیاسی، معاشی، دفاعی، ثقافتی اور عوامی روابط کے شعبوں میں تعاون بڑھانے پر اتفاق ہو گیا۔
نائب وزیراعظم و وزیر خارجہ اسحاق ڈار نے مصر کے وزیر خارجہ ڈاکٹر بدر احمد محمد کے ہمراہ نیوز کانفرنس کرتے ہوئے کہا مصری ہم منصب کے ساتھ بزنس ٹو بزنس تعلقات کے فروغ پر تبادلہ خیال کیا گیا، پاکستان 500 بزنس ہاؤسز کی فہرست مصر کو فراہم کرے گا، ان بزنسز کو دوطرفہ تجارت کے فروغ کے لیے ہر ممکن سہولیات دی جائیں گی۔
اسحاق ڈار کا کہنا تھا پاکستان اور مصرکے درمیان معیشت، دفاع سمیت دیگر شعبوں میں تعاون فروغ پا رہا ہے، مصر کے وزیر خارجہ کا دورہ مشترکہ اہداف کے حصول میں معاون ثابت ہوگا، پاکستان اور مصر کے درمیان دیرینہ شراکت داری اور بھائی چارہ قائم ہے، تجارت، سکیورٹی اور د فاع کے شعبوں میں تعلقات کو مضبوط بنانا پاکستان اور مصر کی مشترکہ ذمہ داری ہے۔
مصر کے وزیر خارجہ ڈاکٹر بدر احمد محمد عبدالعاطی نے کہا غزہ جنگ بندی معاہدے میں پاکستان نے اہم کردار ادا کیا، غزہ کی تعمیرِ نو میں پاکستان کے کردار اور تعاون کے خواہاں ہیں۔
ان کا کہنا تھا مصر شدت پسندی اور دہشتگردی کے خلاف پاکستان کے ساتھ کھڑا ہے، دہشتگردی کے حالیہ حملوں میں جانی نقصان پر حکومت اور عوام سے تعزیت کرتے ہیں اور دونوں ملک مشترکہ چیلنجوں سے مل کر نمٹنے کے لیے پُرعزم ہیں، پاکستان کے ساتھ تعلقات کو مزید مضبوط بنانا چاہتے ہیں۔
Leave a Reply