پاکستان آئیڈل 2025 کی جادوئی آواز، سامعہ گوہر ٹاپ 16 میں شامل ہونے کے بعد آنے والے مقابلے کی تیاریاں لاہور میں بھرپور جوش اور محنت کے ساتھ جاری رکھے ہوئے ہیں۔
”جیونیوز“ سے گفتگو کرتے ہوئے سامعہ کا کہنا تھا کہ وہ اپنی بہترین پرفارمنس پیش کرنے کیلئے دن رات ریاض کر رہی ہیں تاکہ اگلے مرحلے میں بھی شائقین موسیقی کو متاثر کر سکیں۔
اُنہوں نے بتایا کہ کراچی میں جب ہم باہر کھانے پینے جاتے تھے تو لوگ پہچاننا شروع ہوگئے تھے کہ دیکھو! یہ لڑکی ”پاکستان آئیڈل“ میں آتی ہے۔ تو یہ سب دیکھ کر مجھے بہت خوشی محسوس ہوتی تھی۔
سامعہ گوہر نیشنل کالج آف آرٹس (NCA) سے اسکالرشپ پر میوزیکولوجی میں گریجویشن کر چکی ہیں۔
سامعہ نے بتایا کہ اگرچہ انہوں نے موسیقی باقاعدہ طور پر نہیں سیکھی، مگر مستقل ریاض اور لگن نے ان کی آواز کو مزید سریلا اور دلکش بنا دیا ہے۔
ان کا کہنا ہے کہ ”پاکستان آئیڈل“ نے ان کی زندگی کو ایک نئے موڑ پر لا کھڑا کیا ہے۔ بیک اسٹیج پریکٹس ہو یا آن اسٹیج پرفارمنس ہر لمحہ اپنے اندر ایک نیا مزہ اور نیا چیلنج رکھتا ہے۔
سامعہ نے بتایا کہ انہیں نہ صرف پاکستان بلکہ ہمسایہ ملک سے بھی بے پناہ محبت اور حوصلہ افزائی مل رہی ہے۔ گھر والوں کی سپورٹ ہمیشہ سے ان کے ساتھ رہی ہے۔
اُنہوں نے کہا کہ گھر والوں نے کبھی دباؤ نہیں ڈالا کہ تم نے صرف ٹاپ ہی کرنا ہے۔
سامعہ کی والدہ، جو درس و تدریس کے شعبے سے وابستہ ہیں، کہتی ہیں کہ جب بیٹی اسٹیج پر پرفارم کرتی ہے تو دل کی دھڑکن تیز ہو جاتی ہے، کیونکہ ہر والدین کی طرح میری بھی خواہش ہے کہ میری بیٹی ٹاپ سطح پر پرفارم کرے، مجھے اپنی بیٹی کو دیکھ کر بے حد فخر حد محسوس ہوتا ہے۔
سامعہ کامزید کہنا تھا کہ ”پاکستان آئیڈل“کے اگلے مرحلے میں وہ ایسی یادگار پرفارمنس دینے کی پوری کوشش کریں گی جو ناظرین کے دلوں میں بس جائے۔
سامعہ بطور میوزک پروڈیوسر بھی پروفیشنل کام کر رہی ہیں جہاں وہ مختلف فنکاروں کے ساتھ میوزک تخلیق کرتی ہیں۔
Leave a Reply