تصور کریں کہ آپ انعام میں آئی فون کا نیا ماڈل جیت جائیں مگر جب ڈبے کو کھولیں تو ڈیوائس کی جگہ ٹائلز نظر آئیں تو پھر کیسا محسوس ہوگا؟
یقین کرنا مشکل ہوگا مگر چین میں ایک شخص کو اسی حیرت انگیز تجربے کا سامنا ہوا۔
جیانگ جیانگ نامی اس شخص نے اپنی کمپنی کی ایک پارٹی میں آئی فون 17 پرو میکس کا انعام جیتا تھا۔
اس نے بتایا کہ سال کے اختتام پر ہونے والی پارٹی میں اس نے گرینڈ پرائز جیتا جو کہ آئی فون 17 پرو میکس تھا۔
صوبہ گوانگ ڈونگ سے تعلق رکھنے والے جیانگ انعام جیتنے پر بہت زیادہ پرجوش ہوگیا تھا۔
اس نے فیصلہ کیا کہ فون کے ڈبے کو گھر پہنچنے تک نہیں کھولے گا اور اپنی بیوی کو سرپرائز دے گا۔
یہ انعام آئی فون 17 پرو میکس کے اصلی ڈبے جیسا تھا جس کے ساتھ فون کی رسید اور قیمت درج تھی جو کہ 9988 یوآن تھی۔
کمپنی کے سربراہ نے پارٹی کے دوران اس انعام اور فون کی قیمت کا اعلان کیا تھا۔
جیانگ کے مطابق کمپنی کے ہر فرد کا ماننا تھا کہ اس نے آئی فون جیت لیا ہے۔
مگر جب اس نے گھر جاکر ڈبے کو کھولا تو اس نے فون کی جگہ 2 چاکلیٹ، 3 لولی پاپس اور کچھ ٹائلز کو دریافت کیا۔
جیانگ کے مطابق پہلے تو اس کا خیال تھا کہ وہ پارٹی کا سب سے خوش قسمت فرد ہے مگر آخر میں اندازہ ہوا کہ وہ تو شکست خوردہ فرد ہے۔
بیشتر افراد کا خیال تھا کہ پارٹی کے متنظمین نے خفیہ طور پر حقیقی فون کو سستی اشیا سے بدل دیا مگر جیانگ کے مطابق یہ درحقیقت ٹیم منیجر کا مذاق تھا۔
جیانگ نے بتایا کہ کمپنی کے مالک نے فون کی خریداری کی اجازت نہیں دی تھی۔
اس نے مزید بتایا کہ دوسرا انعام ایک تکیے کا تھا۔
جیانگ کے مطابق ‘مجھے لگا کہ 2026 کا آغاز خوش قسمتی سے ہوا ہے مگر پھر معلوم ہوا کہ وہ پارٹی تو اپریل فول جیسی تقریب تھی’۔
اس نے کہا کہ اسے فون کی ضرورت نہیں مگر مذاق کرنے والے فرد کو معافی مانگنی چاہیے۔
Leave a Reply