نیٹو ممالک روس سے ایندھن خریدنا بند کردیں تو بڑی پابندیوں کیلئے تیار ہیں: ٹرمپ

جیسا میں کہہ رہا ہوں نیٹو ویسا کرے تو یوکرین جنگ جلد ختم ہوجائے گی، نیٹو ایسا نہیں کرتا تو میرا وقت اور امریکیوں کا پیسہ ضائع کرے گا: امریکی صدر— فوٹو:فائل

امریکی صدر ٹرمپ نے کہا ہے کہ نیٹو ممالک راضی ہوں تو روس پر بڑی پابندیاں لگانے کے لیے تیار ہوں۔

اپنے بیان میں ٹرمپ کا کہنا تھاکہ نیٹو ممالک بھی روس کے خلاف ایسے ہی اقدامات شروع کریں اور نیٹو ممالک روس سے ایندھن خریدنا بند کردیں تو بڑی پابندیوں کے لیے تیار ہیں۔

انہو ں نے کہا کہ چین پر 50 سے 100 فیصد مشروط ٹیرف یوکرین جنگ کے خاتمے میں مددگار ہوگا، نیٹو کا چین پر مشروط ٹیرف روس یوکرین جنگ خاتمے کے بعد معطل ہوجائے گا، چین کا روس پر مضبوط کنٹرول ہے اور ٹیرف چین کی گرفت کو کمزور کردے گا۔

امریکی صدر کا کہنا تھاکہ یوکرین جنگ ہماری نہیں، بائیڈن اور زیلنسکی کی شروع کی ہوئی ہے، میں جنگ روکنے اور یوکرینی، روسیوں کی جانیں بچانے میں مدد کر رہا ہوں۔

ٹرمپ نے مزید کہاکہ جیسا میں کہہ رہا ہوں نیٹو ویسا کرے تو یوکرین جنگ جلد ختم ہوجائے گی، نیٹو ایسا نہیں کرتا تو میرا وقت اور امریکیوں کا پیسہ ضائع کرے گا۔

دوسری جانب امریکا نے جی 7 اور یورپی یونین پر زور دیا ہے کہ روسی تیل خریدنے والے ممالک خصوصاً بھارت اور چین پر محصولات عائد کریں۔

جی 7 وزرائے خزانہ کے اجلاس میں امریکی وزیر خزانہ اسکاٹ بیسنٹ نے کہا کہ اتحادی ممالک کو امریکا کے ساتھ شامل ہو کر روسی تیل خریدنے والے ممالک پر محصولات لگانے چاہئیں، صرف متحدہ حکمتِ عملی ہی روسی صدر پوتن کی جنگی مشین کو کمزور کر سکتی ہے۔

اجلاس میں یوکرین کے دفاع کیلئے منجمد روسی اثاثوں کے استعمال پر بات چیت کو تیز کرنے پر بھی اتفاق کیا گیا۔

Source link