پاکستان انٹرنیشنل ائیرلائنز (پی آئی اے) نے ٹورنٹو کینیڈا کیلئے اپنی تمام پروازیں 13 سے 27 ستمبر تک معطل کر دیں۔
پی آئی اے ٹورنٹو کیلئے اپنا فلائٹ آپریشن دو بوئنگ 777 ایل آر طیاروں کے ذریعے آپریٹ کرتی ہے، اس وقت ایک طیارہ لینڈنگ گیئر میں خرابی کی وجہ سے گراؤنڈ ہے جبکہ دوسرا طیارہ مینٹیننس کے دوران غیر معیاری جیکس کا استعمال بوئنگ کمپنی کو رپورٹ ہونے کی وجہ سے گراؤنڈ کردیا گیا۔
پی آئی اے کی آفیشل دستاویز کے مطابق ٹورنٹو کیلئے 13 ستمبر سے 27 ستمبر تک آپریٹ ہونے والی تمام دو طرفہ 13 پروازیں منسوخ کر دی گئی ہیں، منسوخ کی جانے والی پروازیں کراچی، لاہور اور اسلام آباد سے آپریٹ ہونا تھیں۔
پی آئی اے ہر ہفتہ ٹورنٹو کیلئے لاہور سے دو کراچی اور اسلام آباد سے ایک ایک پرواز آپریٹ کرتی ہے۔
دوسری جانب پی آئی اے کے ائیرکرافٹ انجینئرز دس سال سے اپنی تنخواہوں میں اضافہ نہ ہونے کے خلاف تین ہفتوں سے مسلسل احتجاج پر ہیں اور بازوں پر سیاہ پٹیاں باندھ کر ڈیوٹی انجام دے رہے ہیں۔
ذرائع نے بتایا کہ اب ائیرکرافٹ انجینئرز نے غیر اعلان کردہ گو بائی بک تحریک بھی شروع کر دی ہے اور طیاروں کی مینٹیننس کتاب میں درج ہدایات سے ہٹ کر نہیں کر رہے ہیں، ائیرلائن کو فاضل پرزہ جات کی بھی شدید کمی ہے اور ان وجوہات کی وجہ سے پروازوں کیلئے طیارے دستیاب نہیں ہیں۔
ذرائع کا کہنا ہے کہ اس بات کا شدید امکان ہے کی پی آئی اے کی ٹورنٹو کیلئے پروازیں 27 ستمبر کے بعد بھی معطل رہیں گی۔
اُدھر پروازوں کی منسوخی کی وجہ سے پی آئی اے کا ٹکٹ لینے والے ہزاروں مسافروں کو شدید پریشانی کا سامنا ہے، کراچی سے ٹورنٹو کے ایک مسافر نے بتایا کہ اس کی 16 ستمبر کی پرواز اب 7 اکتوبر کو کر دی گئی ہے جس کی وجہ سے وہ اپنی ملازمت پر بروقت نہیں پہنچ سکے گا۔
کراچی سے لاہور کیلئے پی آئی اے کی پرواز پی کے 306 کا وقت دو دن میں چار مرتبہ تبدیل ہوا اب اس پرواز کا وقت ہفتہ کی صبح 8 بتا گیا ہے۔
اس وقت پی آئی اے کے 12 بوئنگ 777 طیاروں میں سے صرف تین طیارے اور 12 ائیربس اے 320 طیاروں میں سے صرف 8 طیارے قابل پرواز ہیں، طیاروں کی کمی کی وجہ سے پی آئی اے کا بین الاقوانی اور اندرون ملک پروازوں کا نظام درہم برہم ہو کر رہ گیا ہے۔
اس اسٹوری کیلئے پی آئی اے ترجمان سے رابطہ کیا گیا لیکن وہاں سے کوئی مؤقف نہیں دیا گیا۔
Leave a Reply