وزیر دفاع خواجہ آصف نے کہا ہے کہ غزہ پیس میں شمولیت کی دعوت اچھی بات ہے، اللہ تعالیٰ کی طرف سے پاکستان کو ایک سنہری موقع فراہم کیا جا رہا ہے۔
پارلیمنٹ ہاؤس میں جیو نیوز سے گفتگو خواجہ آصف کا کہنا تھاکہ ڈونلڈ ٹرمپ کی طرف سے شہباز شریف کو غزہ پیس میں شمولیت کی دعوت اچھی بات ہے۔
انہوں نے کہا کہ غزہ کے مستقبل کیلئے جو بھی روڈ میپ تیار ہو گا اس میں پاکستان کلیدی کردار ادا کر سکتا ہے، فلسطینی ریاست کا جو دو ریاستی حل موجود ہے اس پر ساری دنیا متفق ہے، اللہ تعالیٰ کی ذات کی طرف سے پاکستان کو ایک سنہری موقع فراہم کیا جا رہا ہے۔
ان کا کہنا تھاکہ یہ موقع مل رہا ہے پاکستان اپنے فلسطینی بھائیوں کی آزادی نجات اور حقوق کی آواز اٹھائے، وزیر اعظم پاکستان فلسطین کیلئے بھرپور آواز اٹھائیں گے۔
خواجہ آصف نے فوج بھیجنے سے متعلق کہا کہ پاکستان کی طرف سے فوج بھیجنے کے معاملے پرابھی کوئی تبصرہ نہیں کرنا چاہوں گا۔
ان کا کہنا تھاکہ ایران ہمارا ہمسایہ ہے ہمارے اس کے ساتھ قابل رشک تعلقات ہیں،ایرانی ہمارے بھائی ہیں، ایران کے کسی کے خلاف ایسے عزائم نہیں ہیں جو کسی کو تھریٹ کرتے ہوں، پاکستان کی تمام حمایت اسی بات کے لیے ہے کہ ایران کو محفوظ ہونا چاہیے۔
انہوں نے مزید کہا کہ اسرائیل ایک ایسا ملک ہے جس سے سب کو تھریٹ ہے۔
پاک سعودی دفاعی معاہدے کے حوالے سے وزیر دفاع کا کہنا تھاکہ پاکستان اور سعودی عرب دفاعی معاہدے میں کسی اور ملک کی شمولیت کا فیصلہ مل کر کریں گے، اس دفاعی معاہدے میں ترکیے یا کوئی اور ملک شامل ہو سکتا ہے اور اسلامی ممالک کو اپنا دفاع کرنے کیلئے ایک وسیع دفاعی معاہدہ کرنا چاہیے۔
خیال رہے کہ گزشتہ روز امریکی صدر ڈونلڈ ٹرمپ نے غزہ کیلئے بورڈ آف پیس میں وزیراعظم پاکستان شہباز شریف کو شمولیت کی دعوت دی ہے۔
Leave a Reply