غزہ میں صحافیوں کا قتل، دنیا بھر کے 250 میڈیا آؤٹ لیٹس نے اپنے فرنٹ پیجز اور پروگرامز کو بلیک آؤٹ کردیا

اس احتجاج میں قطر، فرانس، برطانیہ، جرمنی، فلسطین، جنوبی کوریا، اسپین اور اٹلی سمیت 70 ممالک کے میڈیا آؤٹ لیٹس حصہ لے رہے ہیں/ فائل فوٹو

غزہ میں اسرائیلی فوج کی جانب سے صحافیوں کو نشانہ بنائے جانے کے خلاف دنیا بھر کے 250 میڈیا آؤٹ لیٹس نے اپنے فرنٹ پیجز اور پروگرامز کو بلیک آؤٹ کردیا۔

غزہ میں 2 سال سے جاری اسرائیلی حملوں اور صحافیوں کے قتل عام پر یہ منفرد مگر طاقتور احتجاج کا اہتمام صحافیوں کی حقوق کے لیے کام کرنے والی عالمی تنظیم رپورٹرز ود آؤٹ بارڈر (RSF) اور عالمی مہم چلانے والی تحریک آواز (Avaaz) کی جانب سے کیا گیا۔

رپورٹ کے مطابق اسرائیلی فوج کے ہاتھوں قتل عام کے خلاف اور صحافیوں کے حق میں ہونے والے اس احتجاج میں تاریخ میں پہلی مرتبہ 70 سے زائد ممالک کے 250 میڈیا آوٹ لیٹس اپنے فرنٹ پیچز، ویب سائٹس ہوم پیچز اور اپنی براڈکاسٹنگ کو بلیک آؤٹ کریں گے۔

رپورٹرز ود آؤٹ بارڈر کے مطابق اس احتجاج میں قطر، فرانس، برطانیہ، جرمنی، فلسطین، جنوبی کوریا، اسپین اور اٹلی سمیت 70 ممالک کے میڈیا آؤٹ لیٹس حصہ لے رہے ہیں۔

رپورٹرز ود آؤٹ بارڈر نے فلسطینی صحافیوں کے تحفظ، غزہ میں میڈیا کی آزاد رسائی، فلسطینی صحافیوں کے خلاف ہونے والے اسرائیلی فوج کے جرائم روکنے کا مطالبہ کیا ہے۔

رپورٹ کے مطابق احتجاج کے دوران ٹیلی ویژن اور ریڈیو اسٹیشن مشترکہ بیان بھی نشر کریں گے جب کہ آن لائن میڈیا آؤٹ لیٹس یکجہتی کی علامت کے طور پر اپنے ہوم پیجز کو بلیک آؤٹ کریں گے یا بینر شائع کریں گے۔

ررورٹرز ود آؤٹ بارڈر کے مطابق غزہ میں تقریباً 2 سال سے جاری اسرائیلی حملوں میں اب تک 220 صحافی جاں بحق ہوچکے ہیں جب کہ بہت سے زخمی بھی ہوئے۔

Source link