عورت کے ریپ سے انصاف کے حصول تک، ’کیس نمبر 9‘ آج سے جیو انٹرٹینمنٹ پر نشر ہوگا

اس ڈرامہ سیریل کی پہلی قسط آج شب 8 بجے صرف جیو انٹرٹینمنٹ پر نشر کی جائے گی/فوٹو جیو انٹرٹینمنٹ

لوگ کیا کہیں گے؟ سمیت اس جیسے دیگر جملوں کی وجہ سے معاشرے کی ہزاروں خواتین خاموش ہو جاتی ہیں اور جہاں جرم پنپتا ہے وہاں عورت انصاف سے محروم ہو جاتی ہے۔

اسی حوالے سے جیو اور سیونتھ اسکائی انٹرٹینمنٹ لارہا ہے، باہمت خاتون کے انصاف کے حصول کی کہانی ”کیس نمبر 9“، اس کہانی کو جیو نیوز کے معروف اینکر پرسن شاہ زیب خان زادہ نے تحریر کیا ہے، ڈرامہ سیریل کی پہلی قسط آج شب 8 بجے صرف جیو انٹرٹینمنٹ پر نشر کی جائے گی۔

ڈرامے کی کاسٹ اور پروڈکشن

ڈرامے کے پروڈیوسرز عبداللہ کادوانی اور اسد قریشی ہیں جبکہ ہدایت کار سید وجاہت حسین ہیں، کاسٹ میں صباء قمر، فیصل قریشی، جنید خان، رشنا خان، آمنہ شیخ، شاہنواز زیدی، حنا بیات، گوہر رشید، علی رحمان خان، نورالحسن، نوین وقار، زہرہ امیر، مزنا وقاص، کامران جیلانی، فائزہ گیلانی، عذرا محی الدین اور دیگر شامل ہیں۔

کیس نمبر 9 میں ایک ایسا جرم جو روزانہ ہوتا ہے مگر ایک ایسا کیس جو آپ نے پہلے کبھی نہیں دیکھا، ہر بدھ اور جمعرات کو رات 8 بجے ”جیو ٹی وی“ پر نشر کیا جائے گا۔

کیس نمبر 9 ناظرین کیلئے ایک متاثرکن کہانی

ہدایت کار سید وجاہت حسین کی ڈائریکشن میں بنی ڈراما سیریل ایک منفرد اور معرکۃ الآراء ڈرامہ سیریل ”کیس نمبر 9“ ناظرین کیلئے ایک متاثرکن کہانی لے کر آرہا ہے، جس میں ایک باہمت اور نڈر لڑکی ”سحر“کے کردار کو بہت ہی منفرد انداز میں دکھایا گیا ہے، یہ کردار معاشرتی بندشوں کو چیلنج کرتے ہوئے دوسروں کے لیے ہمت اور مزاحمت کی علامت بن جاتا ہے۔

ڈرامے میں سحرکا کردار ادا کرنے والی نامور اداکارہ صبا قمر ہیں جنہیں ایک خود اعتماد اور باصلاحیت لڑکی کے روپ میں دکھایا گیا ہے جبکہ ایک اور اہم کردار کامران ہے جو صف اول کے اداکار فیصل قریشی نے انجام دیا ہے، سحر طاقتور اور انا پرست بزنس مین کے سامنے جھکنے سے انکار کرتی ہے اور کامران اپنی انا کے زور پر سحر کو جھکانے کی کوشش کرتا ہے۔

ڈرامے کی کہانی سحر کے حوصلے، جدوجہد اور مزاحمت کے گرد گھومتی ہے، ڈرامے میں سوال اٹھایا گیا ہے کہ آیا سحر، کامران کی سازشوں کا شکار ہوگی یا پھر اپنے حوصلے اور صلاحیت کے بل بوتے پر سرخرو ہوگی۔

عورت کے ساتھ زیادتی عدالت میں شنوائی، وکلاء کی بحث، اثر و رسوخ، دباؤ اور انصاف کے حصول تک کی کہانی ”کیس نمبر نائن“ کا بنیادی خیال ہے، ایسے کیسز میں ثبوت نہ ہونے پر نہیں بلکہ ہمت نہ ہونے پر شکست ہوتی ہے۔

فیصل قریشی اور صبا قمر کی رائے

کیس نمبر 9 سے متعلق اداکار فیصل قریشی کا کہنا ہے کہ اس ڈرامے کی آج کے دور میں شدید ضرورت ہے، وہ چاہتے تھے کہ ایسے پروجیکٹ کا حصہ بنیں جو نئی تاریخ بنا دے اور لوگوں کیلئے ہمیشہ یادگار بن جائے۔

انہوں نے کہا کہ جب اُن کے پاس کیس نمبر9 کا اسکرپٹ آیا تو انہوں نے اپنی ڈیٹس آگے کروائیں تاکہ اس ڈرامے کے ساتھ انصاف کرسکیں۔

دوسری جانب صبا قمر کا کہنا ہے کہ وہ کبھی اسکرپٹ پڑھے بغیر ہاں نہیں کرتیں، جب انہوں نے کیس نمبر 9 کا اسکرپٹ پڑھا تو انہیں لگا کہ کسی سینئر رائٹر نے یہ ڈرامہ لکھا ہے، انہیں یہ جان کر حیرت ہوئی کہ یہ شاہ زیب خانزادہ کا پہلا ڈرامہ ہے۔