وزیر مملکت برائے قانون بیرسٹر عقیل ملک نے کہا ہے کہ پاکستان تحریک انصاف (پی ٹی آئی) سیاسی نوعیت کی ملاقات کرنا چاہتی ہے، بانی پی ٹی آئی عمران خان کی فیملی ان سے ملاقات میں سیاسی امور پر ہی بات کرتی ہے۔
جیو نیوز کے پروگرام آج شاہ زیب خانزادہ کے ساتھ میں گفتگو کرتے ہوئے بیرسٹر عقیل ملک کا کہنا تھاکہ کسی کی خواہشات کے مطابق ملاقات نہیں کرائی جاسکتی، ملاقات کا اختیار سپرنٹنڈنٹ جیل کا ہے اور ملاقات جیل مینول کے مطابق ہوتی ہے۔
انہوں نے کہا کہ ملاقاتوں کا تمام معاملہ پریزن رولز کے مطابق ہوتا ہے، پی ٹی آئی سیاسی نوعیت کی ملاقات کرنا چاہتی ہے، شاہد خاقان عباسی کو 9 ماہ تک کسی سے ملنے نہیں دیاگیا، نوازشریف کی تین ہفتوں تک کسی سے ملاقات نہیں کرائی گئی اور نوازشریف جب جیل میں تھے تو ان سے ملاقات میں کوئی سیاسی بات نہیں ہوتی تھی۔
ان کا کہنا تھاکہ جب جیل سپرنٹنڈنٹ کہہ رہا ہےکہ بانی پی ٹی آئی بالکل ٹھیک ہیں، اڈیالا جیل میں صرف قیدی نمبر 804 نہیں ہے دیگر قیدی بھی ہیں۔
انہوں نے کہا کہ انتظامیہ کو سب کی سکیورٹی کا خیال رکھنا ہوتاہے، سکیورٹی کی صورتحال کو مد نظر رکھتے ہوئے آئندہ منگل کو ملاقات کی اجازت دی جا سکتی ہے، ایسا امکان موجود ہے کہ سکیورٹی کی صورتحال کو دیکھتے ہوئے ایک بہن یا وکیل کی ملاقات کرا ئی جا ئے۔
عقیل ملک کا کہنا تھاکہ بانی پی ٹی آئی کی فیملی ان سے ملاقات میں سیاسی امور پر ہی بات کرتی ہے، احتجاج قانون و آئین کے دائرے میں رہ کر کر یں ، کسی نے منع نہیں کیا، حکومت اپنے شہریوں کی حفاظت کیلئے تمام اقدامات کرے گی۔
انہوں نے مزید کہا کہ بانی پی ٹی آئی کی ان کی بہنوں اور وکلا سے ملاقا ت تو ہوتی رہی ہیں، بانی پی ٹی آئی کی ان کے بیٹوں سے بات چیت ہوتی رہی ہے، بانی پی ٹی آئی کے بیٹے پاکستان آنے کو تیار نہیں۔
عقیل ملک کا کہنا تھاکہ بانی پی ٹی آئی کو واٹس کالز کی سہولت بھی موجود رہی ہے، اڈیالا جیل میں کسی قیدی کو سہولت میسر نہیں کہ وہ واٹس ایپ پر کال کرسکے، اگر عدالت کا حکم ہوگا تو بانی پی ٹی آئی کی ان کے بیٹوں سے کال پر بات کرا دی جائے گی، سپرنٹنڈنٹ جیل از خود بانی پی ٹی آئی کی ان کے بیٹوں سے کال پر بات نہیں کرسکتا، سپرنٹنڈنٹ جیل کا اختیار ایک حدتک ہے۔
Leave a Reply