’عام سا جھگڑا تھا، اسلحہ کا استعمال نہیں ہوا‘، فرحان غنی سے متعلق کیس کی رپورٹ عدالت میں پیش

سرکاری ملازم پر تشدد کے کیس میں زیر حراست چیئرمین چنیسر ٹاؤن فرحان غنی سمیت 3 ملزمان کو رہا کر دیا گیا ہے/ فائل فوٹو

کراچی: پولیس نے چنیسر ٹاؤن چیئرمین فرحان غنی اور دیگر کے خلاف سرکاری ملازم پر تشدد کیس کی رپورت عدالت میں پیش کردی۔

کراچی کی انسداد دہشتگردی کی منتظم عدالت میں چنیسر ٹاؤن چیئرمین فرحان غنی اور دیگر کے خلاف تشدد اور دھمکیاں دینےسے متعلق کیس کی سماعت ہوئی۔

دوران سماعت پولیس نے اپنی رپورٹ عدالت میں پیش کی جس میں بتایا گیا کہ مدعی مقدمہ کھدائی سے متعلق کوئی این او سی پیش نہیں کرسکا، مدعی مقدمہ کسی سرکاری محکمے میں ملازمت ہونے سے متعلق شناخت بھی نہیں کرواسکا۔

پولیس رپورٹ کے مطابق جائے وقوعہ کی سی سی ٹی وی حاصل کرنےمیں کامیابی نہیں ملی، مدعی مقدمہ کا ایک عام سا جھگڑا تھا جس میں کسی قسم کا اسلحہ استعمال نہیں ہوا جب کہ مدعی مقدمہ اب تک کوئی ٹھوس شواہد پیش نہیں کرسکا۔

پولیس رپورٹ میں مزید بتایا گیا ہے کہ مدعی مقدمہ نے تھانے آکر کہا ہے کہ وہ مقدمے کی مزید کارروائی نہیں چاہتا، مدعی کے بیان اور شواہد کی روشنی میں ملزمان کو عدم ثبوت پر رہا کردیا گیا۔

یاد رہے کہ سرکاری ملازم پر تشدد کے کیس میں مدعی مقدمہ کے مقدمہ واپس لینے کے بعد زیر حراست چیئرمین چنیسر ٹاؤن فرحان غنی سمیت 3 ملزمان کو رہا کر دیا گیا ہے۔

Source link