وفاقی وزیر برائے صحت اور متحدہ قومی موومنٹ کے رہنما مصطفیٰ کمال نے کہا ہے کہ شکر ادا کریں یہ فوج آپ کی گندگیوں کا جواب صرف پریس کانفرنس کرکے دے رہی ہے، اتنے ناپاک الزامات کے باوجود فوج صرف بات کر رہی ہے۔
کراچی میں پریس کانفرنس کرتے ہوئے مصطفیٰ کمال کا کہنا تھاکہ پاک فوج نے اپنی سے بڑی ہندوستان کی فوج کے عزائم کو خاک میں ملایا، ہم اس بیانیہ کے خلاف ہیں پاکستان اور فوج کے درمیان کوئی فاصلہ ہے، ہمیں اس فوج اور اس کے سربراہ پر فخر ہے اور احترام ہے۔
انہوں نے کہاکہ شکر کریں کہ فوج صرف پریس کانفرنس کرکے جواب دے رہی ہے، ورنہ اس سے بہت کم گناہ کرنے پر مائیں اپنے بچوں کو ڈھونڈتی رہی ہیں، اتنے ناپاک الزامات کے باوجود فوج صرف بات کر رہی ہے، خدا نہ کرے جو ہمارے ساتھ ہوا وہ آپ کے ساتھ ہو، ورنہ اس سے بہت کم گناہ کرنے پر مائیں اپنے بچوں کو ڈھونڈتی رہی ہیں، ہم کراچی کے رہنے والے ہیں، 40 سالوں میں سب بھگتا ہے۔
ان کا کہنا تھاکہ ہم بھی بند کمروں میں گلہ کرتے ہیں لیکن ہم نے کبھی ملک کی سالمیت کے خلاف کچھ نہیں کیا، ہم ہر صیحح بات کی تائید کریں گے اور غلط بات کی تردید کریں گے، پی ٹی آئی کے دوستوں سے گزارش ہے اپنی پالیسیوں پر نظرثانی کریں، اگر فوجی جنرل ان کی مرضی و منشا سے کام کریں تو ٹھیک ورنہ غلط ہیں، یہ رویہ افسوسناک ہے، یہ ممکن نہیں کہ جب آپ وزیر اعظم ہوں جبھی ملک آگے بڑھے، یہ معاملہ ٹھیک نہیں۔
مصطفیٰ کمال کا کہنا تھاکہ یہ فوج کسی بھی ایک جماعت کی نہیں بلکہ پوری قوم کی ہے، یہ فوج ہی تھی جو خود سے 8 گنا بڑی طاقت سے سامنے سینہ سپر ہوئی، خطے میں بھارت کی بالادستی کے خواب کو چکنا چور کردیا، اس فوج نے اس قوم کے سر کو فخر کو بلند کردیا، پاکستان کی عزت کے بڑھنے میں اللہ نے فوج سے کام لیا ہے۔
انہوں نے مزید کہا کہ پی ٹی آئی اور اس کے سربراہ قومی فوج اور اس کی لیڈر شپ کو پوری دنیا میں بدنام کررہے ہیں، پی ٹی آئی فوج کےحوصلے کو پست کرنے کی کوشش کر رہے ہیں،ایم کیو ایم پاکستان اس بیانیے کے خلاف ہیں فوج اور عوام میں کوئی خلیج موجود ہے۔
ایم کیو ایم کے رہنما ڈاکٹر فاروق ستار کا کہنا تھاکہ تحریک انصاف کا بیانیہ قومی سلامتی کے خلاف ہے، ڈی جی آئی ایس پی آر نے ٹھیک کہا تھا بانی تحریک انصاف ذہنی مریض ہیں۔
Leave a Reply