کئی پاکستانی ڈراموں میں اداکاری کے جوہر دکھانے والی سینئر اداکارہ منزہ عارف نے انکشاف کیا ہے کہ انہوں نے اپنے شوہر کو دوسری شادی کرنے کا مشورہ دیا تھا۔
حال ہی میں ایک انٹرویو کے دوران منزہ عارف نے اپنی اداکاری کے کیرئیر سمیت نجی زندگی سے متعلق گفتگو کی۔
انہوں نے بتایا کہ میں شوبز میں آنے سے قبل لاہور میں بطور ماہر تعلیم کام کرتی تھی اور اسی دوران میں نے ڈرامہ انڈسٹری میں قدم رکھا، اب کراچی میں اپنے پروجیکٹس کے باعث طویل عرصے سے رہائش پذیر ہوں۔
اداکارہ نے کہا کہ کراچی میں رہنے کی وجہ سے شوہر کی فکر رہتی تھی، جب بھی میں کراچی سے لاہور یا لاہور سے کراچی کے لیے سفر کرتی تو میرے شوہر مجھے خود ائیرپورٹ چھوڑنے اور لینے آتے تھے۔
منزہ عارف کا کہنا تھا کہ میرے شوہر میرا سب سے بڑا سہارا ہیں، وہ مجھ سے محبت کرتے ہیں، مجھ پر اعتماد کرتے ہیں اور ہمیشہ مجھے اپنی مرضی کے مطابق زندگی گزارنے اور کیرئیر میں مزید آگے بڑھنے کے لیے حوصلہ افزائی کرتے رہتے ہیں۔
انہوں نے بتایا کہ کراچی میں طویل قیام کی وجہ سے میں نے شوہر سے ہلکے پھلکے انداز میں کہا کہ آپ چاہیں تو دوسری شادی کر سکتے ہیں کیونکہ شاید آپ تنہائی محسوس کرتے ہوں، مجھے لگا تھا کہ وہ یہ بات سن کر خوش ہو جائیں گے مگر الٹا وہ پریشان ہوگئے اور مجھ سے سوال پوچھا کہ تم یہ مشورہ کیوں دے رہی ہو؟ کیا تمہارے ذہن میں کوئی اور پلان ہے؟
اداکارہ نے ہنستے ہوئے بتایا کہ یہ صرف میاں بیوی کے درمیان ایک مذاق تھا، جسے ان کے شوہر نے بالکل سنجیدہ نہیں لیا اور نہ ہی کبھی لینے والے ہیں۔
منزہ عارف نے دوران انٹرویو اپنے شوہر کو مکمل ’گرین فلیگ‘ قرار دیتے ہوئے کہا کہ وہ ہر قدم پر میری سپورٹ میں کھڑے نظر آتے ہیں۔
Leave a Reply