سیالکوٹ میں بارش کا 11 سالہ ریکارڈ ٹوٹ گیا، 24 گھنٹوں میں 355 ملی میٹر سے زائد بارش برس گئی

رنگ پورہ، شہاب پورہ، دارا آرائیاں،علامہ اقبال چوک،پریم نگر سمیت متعدد علاقوں میں پانی جمع ہوگیا، مزید دو سے چار گھنٹے بارش جاری رہنے کا امکان ہے: ڈی سی— فوٹو: اسکرین گریب

سیالکوٹ میں بارش کا 11 سال کا ریکارڈ ٹوٹ گیا۔

ڈپٹی کمشنر کے مطابق سیالکوٹ میں 24 گھنٹوں میں 355 ملی میٹر سے زائد بارش ریکارڈ کی گئی جس کے بعد رنگ پورہ، شہاب پورہ، دارا آرائیاں، علامہ اقبال چوک، پریم نگر سمیت متعدد علاقوں میں پانی جمع ہوگیا۔

ڈی سی نے بتایاکہ محکمہ موسمیات کے مطابق مزید دو سے چار گھنٹے بارش جاری رہنے کا امکان ہے۔

ضلعی انتظامیہ کے مطابق نالہ ڈیک میں انتہائی اونچے درجے کا سیلاب ہے اور پانی کا بہاؤ 77 ہزار کیوسک ریکارڈ کیا گیا جبکہ سیلاب کے باعث متعدد دیہات زیر آب آگئے اور متاثرہ دیہاتوں سے لوگوں کو محفوظ مقامات پر منتقل کیا جارہا ہے۔

ضلعی انتظامیہ نے بتایاکہ دریائے چناب میں اونچے درجے کا سیلاب ہے اور پانی کی سطح 3لاکھ 65 ہزار ہوگئی جبکہ دریائے راوی میں کوٹ نیناں کے مقام پرپانی کا بہاو 210000 کیوسک ہوگیا اور دریائے راوی جسڑ کے مقام پر پانی کا بہاؤ 142020 کیوسک ریکارڈ کیا گیا۔

ڈپٹی کمشنر نے بتایاکہ دریائے راوی میں اس وقت اونچے درجے کا سیلابی ریلا گزر رہا ہے جبکہ کرتارپور سمیت مختلف مقامات سے اب تک 257 لوگوں کو ریسکیو کیا گیا۔

Source link