جنوبی وزیرستان کے کیڈٹ کالج وانا پر دہشت گردوں نے بزدلانہ حملہ کیا جسے سکیورٹی فورسز نے ناکام بنا دیا۔
پاک فوج کے شعبہ تعلقات عامہ ( آئی ایس پی آر) کے مطابق بھارتی سرپرستی یافتہ گروپ فتنہ الخوارج نے جنوبی وزیرستان کے کیڈٹ کالج وانا پر حملہ کیا۔
آئی ایس پی آر کے مطابق حملہ آوروں نے پریمیئر سکیورٹی کو توڑنے کی کوشش کی، تاہم سکیورٹی فورسز نے حملہ آور کے منصوبوں کو تیزی سے ناکام بنایا۔
آئی ایس پی آر کا کہنا ہے کہ مایوسی میں حملہ آوروں نے مین گیٹ پر ایک بارودی گاڑی ٹکرادی، دھماکے سے مرکزی گیٹ اور ملحقہ انفراسٹرکچر کو نقصان پہنچا۔
آئی ایس پی آر کے مطابق بھارتی سرپرستی یافتہ 2 خوارج ہلاک کردیے گئے، 3 خوارج کالج کے احاطے میں داخل ہوئے ، تینوں خوارج اب کالج کے ایڈمنسٹریٹو بلاک میں محصور ہیں۔
آئی ایس پی آر کا کہنا ہے کہ خوارج اے پی ایس میں وحشیانہ اقدام کی طرز پر دہشت گردی دہرانے کی کوشش کررہے تھے۔
آئی ایس پی آر کے مطابق کالج کے اندر چھپے خوارج افغانستان میں اپنے آقاؤں اور ہینڈلرز کے ساتھ رابطے میں ہیں، خوارج افغانستان اپنے ہینڈلرز سے ہدایات وصول کر رہے ہیں۔
آئی ایس پی آر کا کہنا ہے کہ پاکستان دہشت گردوں اور افغانستان میں موجود ان کی قیادت کے خلاف جواب کا حق محفوظ رکھتا ہے۔خوارج کا ہدف قبائلی علاقوں کی نوجوان نسل میں خوف پھیلانا ہے۔
آئی ایس پی آر نے کہا ہے کہ افغانستان میں دہشت گرد گروہوں کی موجودگی افغان طالبان کے دعوؤں کے برعکس ہے۔
آئی ایس پی آر کے مطابق بھارتی سرپرستی یافتہ خوارج کے خاتمے کے لیے کلیئرنس آپریشن جاری ہے، عزمِ استحکام کے تحت بلا روک ٹوک انسدادِ دہشت گردی اقدامات جاری رکھیں گے، ملک سے بیرونی سرپرستی یافتہ دہشت گردی کا خاتمہ ممکن بنایا جائے گا۔
Leave a Reply