اسٹریمنگ سروس نیٹ فلکس کی مقبول ترین سیریز ایمیلی اِن پیرس کے اسسٹنٹ ڈائریکٹر ڈیاگو بوریلا (Diego Borella) شوٹنگ کے دوران اچانک چل بسے۔
برطانوی خبری ایجنسی کی رپورٹ کے مطابق 47 سالہ ڈیاگو کی اچانک موت کا واقعہ اٹلی کے شہر وینس میں پیش آیا جہاں شو کے پانچویں سیزن کی ریکارڈنگ جاری تھی۔
ڈیاگو بوریلا جمعرات کو ہوٹل ڈینیلی میں شوٹنگ کی تیاری کر رہے تھے کہ اچانک گر پڑے، طبی عملے نے فوری طور پر ان کا علاج کرنے کی کوشش کی لیکن وہ موقع پر ہی دم توڑ گئے۔
مذکورہ سیریز نیٹ فلکس پر پیش کرنے والے پیراماؤنٹ ٹیلی ویژن اسٹوڈیوز کا کہنا ہے کہ ہم انتہائی دکھ کے ساتھ اپنی پروڈکشن فیملی کے ایک رکن کی اچانک موت کی خبر کی تصدیق کرتے ہیں، ہمارے دل اس مشکل گھڑی میں مرحوم کے اہلخانہ اور عزیزوں کے ساتھ ہیں۔
اسسٹنٹ ڈائریکٹر کی موت کے بعد شو کی شوٹنگ عارضی طور پر روک دی گئی ہے۔
واضح رہےکہ ایمیلی ان پیرس کے پانچویں سیزن کی شوٹنگ 15 اگست سے وینس میں جاری تھی جو 25 اگست تک مکمل ہونا تھی۔
یاد رہے کہ ایمیلی ان پیرس ایک رومانٹک کامیڈی سیریز ہے جس کا پہلا سیزن 2020 میں کووڈ کے دوران ریلیز کیا گیا تھا۔
رپورٹس میں بتایا جارہا ہے کہ اس مقبول سیریز کا پانچواں سیزن رواں برس کے اختتام پر 18 دسمبر کو ریلیز کیا جائے گا۔
Leave a Reply