بالی وڈ کے سنجو بابا کی پرانی ویڈیو ایک بار پھر سوشل میڈیا کی زینت بنی ہوئی ہے جس میں وہ اپنے والد کی بات کرتے ہوئے جذباتی ہوگئے۔
سوشل میڈیا پر وائرل ہونے والی ویڈیو میں سنجے دت جذباتی انداز میں اپنے والد اداکار سنیل دت کے کہے گئے جملے کہہ رہے ہیں جس میں انہوں نے کہا تھا کہ پاکستان میرا گھر ہے۔
وائرل ہونے والی مختصر ویڈیو چند سال پرانی ہے، جب سنجے دت بھارتی میوزیکل شو میں بطور مہمان شریک ہوئے تھے، جس میں وہ کہہ رہے ہیں کہ ایک رات کو میں دیر سے گھر لوٹا تو دیکھا والد تنہا کمرے میں رو رہے ہیں جس پر میں ان کے پاس گیا۔
اداکار کا کہنا تھا کہ میں نے سوچا کہ شاید انہیں مرحومہ والدہ یاد آ رہی ہوں گی، اس لیے وہ افسردہ ہیں لیکن جب میں نے والد سے پوچھا اور انہیں سوجانے کا کہا تو ان کے والد نے انہیں کہا کہ انہیں نیند نہیں آئے گی، انہیں اپنا گھر یاد آ رہا ہے۔
سنجے دت کا کہنا تھا کہ وہ والد کی بات پر حیران ہوئے اور انہیں بتایا کہ ان کا گھر تو یہی ہے۔
اداکار نے بتایا کہ میری بات پر والد نے کہا کہ نہیں یار، تو سمجھے گا، مجھے اپنا گھر یاد آ رہا ہے، مجھے پاکستان یاد آرہا ہے۔
سنجے دت نے کہا کہ میرے والد پاکستان کو اپنا گھر سمجھتے تھے اور وہ تقسیم ہند کے بعد وہ مسلسل اپنے گھر کو یاد کرتے رہے تھے۔
خیال رہے کہ سنجے دت کے والد اداکار و فلم ساز سنیل دت کے آباؤ و اجداد کا تعلق حالیہ راولپنڈی ڈویژن سے تھا، ان کے والد کے آباؤ و اجداد تقسیم ہند کے بعد بھارت چلے گئے تھے۔
سنیل دت ہندو پنجابی تھے جب کہ ان کی والدہ اداکارہ نرگس دت بنگالی مسلمان تھیں جن کی پیدائش کلکتہ میں ہوئی۔
Leave a Reply