بھارتی میڈیا نے انکشاف کیا ہے کہ معروف ٹیکنالوجی ویب سائٹ اور ای میل سروس ہاٹ میل کے بانی صابر بھاٹیہ ماضی میں بالی وڈ اداکارہ ایشوریا رائے سے شادی کی خواہش کا اظہار کرچکے ہیں ۔
بھارتی میڈیا کے مطابق ماضی میں ہاٹ میل کے بانی صابر بھاٹیہ نے عوامی گفتگو کے دوران اداکارہ ایشوریا رائے کی تعریف کی تھی حتیٰ کہ ایک انٹرویو کے دوران صابر بھاٹیہ نے ان سے شادی کی خواہش بھی ظاہر کی تھی۔
سلمان خان اور صابر بھاٹیہ کی ملاقات
2001 کے دوران جس وقت سلمان خان اور ایشوریا رائے کے تعلقات کے چرچے ہر جگہ عام تھے اس دوران ایک ہائی پروفائل پارٹی میں صابر بھاٹیہ کی ملاقات سلمان سے ہوئی جس دوران میزبان سیمی گریوال بھی موجود تھیں۔
اس ملاقات کے دوران سلمان نے چہرے پر طنزیہ مسکراہٹ سجائے صابر بھاٹیہ سے سوال کیا تھا کہ’ تو وہ شخص آپ ہیں جو ایش سے شادی کرنا چاہتے ہیں؟‘
جواب میں صابر بھاٹیہ نے سپر اسٹار کے آگے اس خواہش کو میڈیا پر چلنے والی افواہ قرار دے کر بات ٹالنے کی کوشش کی لیکن سلمان نے جواباً بات جاری رکھتے ہوئے انہیں بتایا کہ ’ وہ ایک اچھی لڑکی ہے‘ ۔
بھارتی میڈیا کے مطابق اسی تقریب میں جب صابر بھاٹیہ ایک خاتون مہمان کے ساتھ تصویر بنوارہے تھے تو سلمان خان بھی اچانک اسی خاتون کے بازو پر ہاتھ رکھتے ہوئے فریم میں شامل ہوگئے جس دوران سلمان کے ہاتھ میں موجود سگریٹ صابر بھاٹیہ کے ہاتھ پر لگ گئی۔
جب صابر بھاٹیہ نے سگریٹ کی راکھ صاف کرنے کی کوشش تو اداکار نے ان سے کہا “اف! بلآخر آپ کے ہاتھوں ‘راکھ’ ( ‘ash’ ) آہی گئی، سلمان کی گفتگو پر کمرے میں موجود ہر شخص حیران رہ گیا تھا۔
صابر بھاٹیہ کی بالی وڈ کی دیگر اداکاراؤں سے مبینہ تعلق کی افواہیں
واضح رہے کہ ایشوریا رائے سے قبل صابر بھاٹیہ کا نام امیشا پٹیل اور سشمیتا سین سے بھی جوڑا جاچکا ہے تاہم ان مبینہ تعلقات کے حوالے سے کوئی باضابطہ اعلان سامنے نہیں آسکا تھا۔
بعد ازاں 9 مارچ 2008 کو صابر بھاٹیہ نے اپنی قریبی دوست تانیا شرما سے شادی کی تھی، جوڑے کی ایک بیٹی آریانا ہے لیکن شادی کے 5 سال بعد جوڑے کے درمیان علیحدگی ہوگئی۔
Leave a Reply