وزیراعلیٰ پنجاب مریم نواز نے کہا ہے کہ صوبے میں سنگین واقعات پر ” مٹی پاؤ ” کا دور ختم ہوا،،، اب پنجاب کی بیٹیوں کے خون کا حساب لیا جائے گا۔
سانحہ بھاٹی گیٹ پر بات کرتے ہوئے مریم نواز نے کہاکہ سعدیہ اور ان کی معصوم پری کے زخم دیکھ کر دل خون کے آنسو رویا، یہ زخم پنجاب کے ماتھے پر لگے ہیں۔
ان کا کہنا تھاکہ صوبے میں سنگین واقعات پر ” مٹی پاؤ ” کا دور ختم ہوا، اب پنجاب کی بیٹیوں کے خون کا حساب لیا جائے گا، ہنستا بستا گھرانہ اجاڑنے والوں کو کیفر کردار تک پہنچانا میرا مشن ہے۔
دوسری جانب وزیر اعلیٰ مریم نواز کے نوٹس کے بعد سانحہ بھاٹی کا ‘ڈیتھ ٹریپ’ محفوظ زون میں تبدیل کردیا گیا، سائٹ کو جدید سیفٹی پروٹوکولز سے ڈھانپ دیا گیا اور حفاظتی اقدامات کے بغیر کام پر مکمل پابندی لگادی گئی ہے۔
ذرائع کے مطابق سانحہ بھاٹی گیٹ کی تفتیش نجی کمپنی سے بڑھ کر ‘نااہل افسران’ کے گریبانوں تک پہنچ گئی، حادثے میں جاں بحق خاتون اور بچی کی پوسٹ مارٹم رپورٹ سے کیس مزید تیزی سے آگے بڑھے گا۔
یاد رہے کہ گزشتہ دنوں لاہور کے علاقے بھاٹی گیٹ میں داتا دربار کے قریب ایک خاتون اور اس کی بچی سیوریج لائن میں گر کر جاں بحق ہو گئی تھیں تاہم ابتدائی طور پر پولیس اور دیگر متعلقہ ادارے اس خبر کو غلط قرار دیتے رہے اور کہا کہ ایسا کوئی واقعہ پیش ہی نہیں آیا لیکن تقریباً 10 گھنٹے بعد خاتون اور اس کی بچی کی لاشیں 3 کلومیٹر دور سے برآمد ہوئیں۔
Leave a Reply