واشنگٹن: سابق امریکی صدر باراک اوباما نے ایلینئز سے متعلق اپنے بیان کی وضاحت میں کہا ہے کہ زمین پر خلائی مخلوق کی آمد کے امکانات ’کم‘ ہیں۔
ہفتے کے روز ایک پوڈکاسٹ میں اوباما نے امریکی پوڈکاسٹ میزبان برائن ٹائلر کوہن کے ایلیئنز سے متعلق سوال کے جواب میں کہا تھا کہ ’ایلیئنز حقیقت میں ہوتے ہیں لیکن میں نے انہیں نہیں دیکھا‘۔
اوبامانے مزید کہا کہ ’کسی خلائی مخلوق کو ایریا 51 میں نہیں رکھا گیا۔ وہاں کوئی زیرِ زمین تنصیب نہیں ہے‘۔
بعد ازاں اوباما نے کہا کہ ان کا یہ بیان تیز رفتار سوال و جواب کے سیشن کے مطابق تھا۔ انہوں نے وضاحت کرتے ہوئے کہا کہ کائنات اتنی وسیع ہے کہ کہیں نہ کہیں زندگی کے امکانات موجود ہو سکتے ہیں، تاہم اپنی صدارت کے دوران انہوں نے خلائی مخلوق کی جانب سے زمین سے رابطے کا ’کوئی ثبوت نہیں دیکھا‘ ۔
اوباما کا ابتدائی بیان ایک مختصر ’لائٹننگ راؤنڈ‘ کے دوران دیا گیا تھا جہاں پہلا سوال یہی تھا کہ ’کیا خلائی مخلوق حقیقت میں ہیں‘؟
اس سوال پر اوباما کے جواب کو مختلف میڈیا اداروں نے نشر کیا اور یہ آن لائن تیزی سے وائرل ہوگیا، جس کے بعد انہوں نے اتوار کو اپنے سرکاری انسٹاگرام اکاؤنٹ پر وضاحتی بیان جاری کیا۔
انہوں نے ویڈیو کلپ کے ساتھ تحریر میں لکھا کہ ’میں تیز رفتار سوالات کے انداز کے مطابق جواب دے رہا تھا لیکن چونکہ اس پر توجہ دی گئی ہے اس لیے وضاحت کر دوں کہ کائنات اتنی وسیع ہے کہ زندگی کے امکانات موجود ہو سکتے ہیں۔ لیکن سولر سسٹمز کے درمیان فاصلے اتنے زیادہ ہیں کہ اس بات کے امکانات کم ہی ہیں کہ ہمیں خلائی مخلوق نے وزٹ کیا ہو اور اپنی صدارت کے دوران میں نے اس بات کا کوئی ثبوت نہیں دیکھا کہ ایلیئنز نے ہم سے رابطہ کیا ہو‘۔
Leave a Reply