پشاور: خیبرپختونخوا حکومت کی جانب سے افغانستان کے زلزلہ متاثرین کے لیے امدادی سامان روانہ کردیا گیا۔
پی ڈی ایم اے آفس میں افغانستان کے زلزلہ متاثرین کے لیے سامان بھیجنے کی تقریب ہوئی۔
تقریب میں چیف سیکرٹری شہاب علی اور افغان قونصل جنرل محب اللہ شاکر نے شرکت کی۔
اعلامیے کے مطابق امدادی سامان میں خیمے ترپال، تکیے، رضائیاں اور کمبل شامل ہیں، امدادی سامان میں 2 ٹرک دوائیوں کے بھی شامل ہیں۔
چیف سیکرٹری کا کہنا تھا کہ مشکل گھڑی میں افغان بھائیوں کے ساتھ کھڑے ہیں ، ریلیف اور مدد کا سلسلہ متاثرہ خاندانوں کی بحالی تک جاری رہےگا۔
خیال رہے کہ افغانستان میں 6 شدت کے خطرناک زلزلے کے نتیجے میں اموات کی تعداد 1400 سے تجاوز کرگئی ہے۔
افغان حکومت کے ترجمان ذبیح اللہ مجاہد کے مطابق اتوار اور پیر کی درمیانی شب آنے و الے زلزلے سے اموات کی تعداد 1411 ہوگئی ہے۔
افغان ہلال احمر کے مطابق زلزلے سے 3251 افراد زخمی ہیں اور 8 ہزار سے زائد گھر تباہ ہوئے ہیں۔
افغانستان کے سرکاری میڈیا کا بتانا ہےکہ زلزلے سے سب سے زیادہ نقصان صوبے کنڑ میں ہوا ہے۔
امریکی جیولوجیکل سروے کے مطابق زلزلےکا مرکز صوبے ننگرہار کے شہر جلال آباد کے قریب تھا اور اس کی گہرائی 8 کلو میٹر ریکارڈ کی گئی۔
Leave a Reply