بنگلادیش کی پہلی خاتون وزیراعظم خالدہ ضیا کی نماز جنازہ آج ڈھاکا میں پارلیمنٹ ہاؤس کے سامنے ادا کی جائے گی۔
اسپیکر قومی اسمبلی ایاز صادق خالدہ ضیا کی نماز جنازہ کے موقع پر پاکستان کی نمائندگی کریں گے، سردار ایاز صادق وزیراعظم شہبازشریف کی خصوصی ہدایت پر ڈھاکہ جارہے ہیں، وہ خالدہ ضیا کے اہلخانہ سے حکومت پاکستان اور عوام کی طرف سے تعزیت کریں گے۔
خالدہ ضیا کو سابق صدر اور ان کے شوہر ضیاء الرحمان کے پہلو میں قومی اعزاز کے ساتھ سپرد خاک کیا جائے گا۔
خالدہ ضیا کے انتقال پر بنگلا دیش میں 3 روزہ سوگ کا اعلان کیا جاچکا ہے۔ خالدہ ضیا جگر کے عارضے سمیت کئی امراض میں مبتلا تھیں اور کافی عرصے سے ڈھاکا کے اسپتال میں زیر علاج تھیں تاہم گزشتہ روز وہ خالق حقیقی سے جا ملیں۔
خالدہ ضیا بنگلا دیش کی معروف سیاستدان تھیں، جنہوں نے 1991 سے 1996 اور پھر 2001 سے 2006 تک ملک کی وزیراعظم کے طور پر خدمات انجام دیں۔
وہ بنگلا دیش کی پہلی خاتون وزیراعظم تھیں جبکہ انہیں مسلم دنیا میں بے نظیر بھٹو کے بعد دوسری خاتون وزیراعظم ہونے کا اعزاز بھی حاصل تھا۔
خالدہ ضیا بنگلادیش کے سابق صدر ضیاء الرحمان کی اہلیہ تھیں۔ سیاسی کیریئر کے دوران ان پر کرپشن کے الزامات لگے۔ انہیں 2018 میں 5 برس کیلئے جیل بھی کاٹنا پڑی تھی۔
Leave a Reply