مسقط: عمان حکومت نے اعلان کیا ہےکہ سلطنت میں یکم رمضان 19 فروری کو ہوگا۔
غیر ملکی میڈیا کے مطابق عمان چاند کی باقاعدہ رویت سے ایک ہفتہ قبل ہی رمضان کی پہلی تاریخ کا اعلان کرنے والا پہلا عرب ملک ہے۔
عمان کے سرکاری میڈیا کی جانب سے اعلان کیا گیا ہےکہ بدھ 18 فروری کو ماہ شعبان کا آخری روز ہوگا جب کہ جمعرات 19 فروری 2026 یکم رمضان 1447ہجری ہوگا۔
عمان کی مرکزی رویت ہلال کمیٹی کے مطابق فلکیاتی حساب سے یہ ثابت ہو چکا ہےکہ منگل 29 شعبان کو چاندکا نظر آنا فلکیاتی طور پر ناممکن ہے اور یہ طے ہے کہ سائنسی حقائق کسی دن چاند نظر آنے کو ناممکن قرار دیں تو اس کے برخلاف موصول ہونے والی شہادتیں قبول نہیں کی جاتیں، اس لیے کمیٹی اعلان کرتی ہے کہ بدھ 18 فروری 2026 شعبان کا آخری روز ہوگا اور جمعرات 19 فروری 2026 یکم رمضان 1447ہجری ہوگا۔
دوسری جانب متحدہ عرب امارات میں جامعہ شارجہ کے تحت قائم شارجہ اکیڈمی برائے فلکیات، خلائی سائنس اور ٹیکنالوجی نے بھی اس سال رمضان کے چاند کے بارے میں تفصیلی پیش گوئی جاری کی ہے۔
اکیڈمی کی ٹیم نے تصدیق کی ہے کہ 17 فروری کو چاند کا نظر آنا ممکن نہیں ہوگا، نہ صرف شارجہ اور یو اے ای میں بلکہ بیشتر اسلامی دنیا میں بھی جدید ترین دور بینوں کی مدد سے چاند کا نظر آنا ممکن نہیں، اس بناء پر رمضان المبارک کا آغاز 19 فروری کو متوقع ہے۔
Leave a Reply