ترمیم متنازع نہیں، بلاول، نامعلوم افراد کا شکریہ، عمر ایوب

اسلام آباد: چیئرمین پیپلز پارٹی بلال بھٹو زرداری نے کہا ہے26ویں آئینی ترمیم کیلیے آئین میں کچھ ترامیم سو فی صد اتفاق رائے سے منظور کی گئیں، پی ٹی آئی سے کہوں گا کم از کم مولانا کی ترامیم متفقہ طور پر منظور کریں۔

انھوں نے قومی اسمبلی کے اجلاس سے خطاب میں کہا ملک میں کالا سانپ افتخار چودہری والی عدلیہ ہے، ہم نے اٹھاون ٹو بی کا اختیار صدر سے واپس لیا تو عدالت نے وہ اختیار اپنے پاس رکھ لیا، ایک وزیراعظم کو خط نہ لکھنے پر فارغ کردیا گیا اور ایک وزیراعظم کو بیٹے سے تنخواہ نہ لینے پر فارغ کر دیا گیا،آپ نے وزیراعظم خود نکالے مگر قومی اسمبلی کے ارکان سے یہ اختیار لے لیا کہ وہ قائد ایوان پر عدم اعتماد کر سکیں۔

افتخار چوہدری نے پوری 18ویں ترمیم اٹھا کر پھینکنے کی دھمکی دی، اس لیے بلیک میلنگ میں آکر 19ویں ترمیم کرناپڑی، الجہاد کیس کے تحت جج لگانے کا اختیار ججوں نے اپنے پاس رکھ لیا،مشرف دور میں پی سی او پر حلف لیا گیا، جب اس کی کرسی خطرے میں تھی تواسے جمہوریت یاد آگئی، سیاست دانوں نے اس زمانے میں ججوں کو عادت ڈالی چیف تیرے جاں نثار، بے شمار بے شمارکے نتیجے میں عدالتوں کا دنیا بھر میں مذاق بن گیا، آلو اور ٹماٹر کی قیمتوں کا فیصلہ بھی عدالتیں کرنے لگیں، ریکوڈک کیس کے باعث ملک کو کتنا نقصان ہو گیا۔

آئینی عدالت کی تجویز سب سے پہلے قائداعظم محمد علی جناح نے گول میز کانفرنس میں دی تھی، جسٹس دراب پٹیل، افتخار چودہر ی کی طرح پی سی او جج نہیں تھے۔ جسٹس دراب پٹیل نے انسانی حقوق کمیشن کی بنیاد رکھی اور آئینی عدالت کی تجویز دی ،جس میں تمام صوبوں کی مساوی نمائندگی ہو۔ 2006ء میں میثاق جمہوریت کے ذریعے طے کیا ،آئینی عدالت بنے گی، تمام جمہوری جماعتوں نے آئینی عدالت کے قیام پر اتفاق کیا، شیکسپیئر نے کہا تھا گلاب کو کسی بھی نام سے پکاریں وہ گلاب ہو گا، جب سینیٹ بنا تو کسی نے نہیں کہا پارلیمان کے اوپر پارلیمان بنا رہے ہو، آئینی بینچ میں چاروں صوبوں کی نمائندگی ہوگی۔

مولانا اور پی ٹی آئی کے مطالبے پر آئینی عدالت کا مطالبہ چھوڑ کر آئینی بینچ بنانے جا رہے ہیں، صوبوں میں بھی آئینی بینچ کی تجویز دی ، جس سے عوام کا فائدہ ہوگا، ماتحت عدلیہ سب سے سْست ہے، صوبوں میں آئینی بینچ قائم ہوں گے تو عوام کو فوری انصاف ملنا شروع ہو جائے گا۔ جے یو آئی نے سود اور اسلامی نظریاتی کونسل کے متعلق ترمیم کی تجویز دی۔

قبل ازیں بلاول نے پریس کانفرنس میں کہا کہ آپ سب کو 26 ویں آئینی ترمیم مبارک ہو،اس میں کوئی متنازع نکتہ نہیں۔ مولانا سے ٹیلی فونک رابطہ ہوا ،ان کا جتنا شکریہ ادا کروں وہ کم ہے، جے یو آئی نے مسودے پر بہت محنت کی۔ پی ٹی آئی نے ہر فورم استعمال کیا لیکن ترمیم پر ایک لفظ نہیں دیا، میری اور مولانا کی پریس کانفرنس کے بعد ان کا ردعمل افسوسناک ہے۔ بلاول نے وفاقی کابینہ کی جانب سے ترمیم کی منظوری کے بعد کہا جسٹس منصور علی شاہ کا خود کہنا ہے سنیارٹی کے ساتھ میرٹ بھی ضروری ہے، اگر وہ میرٹ پر پورے اترے تو چیف جسٹس بن جائیں گے۔ موجودہ چیف جسٹس نے مجھے وہ انصاف دیا جو کوئی اور نہیں دے سکتا۔ مجھے اور آصفہ کو وہ انصاف دیا جو کوئی کبھی نہیں دے سکا، اس جج نے مشرف کو سزا دی، فیض آباد دھرنے کا فیصلہ دیا۔ یہ پاکستان کیلئے تاریخی دن ہے، مجھے کوئی طعنہ نہیں دے سکتامیں نے جلد بازی کی۔

اپوزیشن لیڈر عمر ایوب نے قومی اسمبلی سے خطاب میں کہا کہ جن لوگوں کا شکریہ ادا کیا جارہا تھا، وہاں نامعلوم افراد کو بھی شامل کرتے، آئینی ترمیم آزاد عدلیہ کا گلہ گھونٹنے کا عمل ہے۔یہ عوام کی نمائندگی نہیں کرتی، 31 اکتوبر کوترمیم منظور ہوجاتی تو کیا ہوجاتا۔

مبارک زیب،ظہور قریشی، اورنگزیب کھچی، ریاض فتیانہ، زین قریشی، عادل بازئی پر دباؤ ڈالا گیا۔عادل بازئی کے پلازے گرائے گئے، زین قریشی کی اہلیہ کو رات کے وقت گاڑی سے نکال کر اغوا کیا گیا، فجر کے وقت سپیکر ایاز صادق نے میسج کرکے بتایا وہ واپس آگئیں۔ ریاض فتیانہ کے بیٹے کو دو بار اغوا کیا گیا، انتظار پنجھوتہ 11 دن سے غائب ہیں، مبین جٹ کا گھر مسمار کیا گیا، اس سارے عمل میں ہمارے ارکان کو زدوکوب کیا گیا۔

چوہدری الیاس، عثمان علی کو اغوا کرکے یہاں لے کر آگئے، مبارک زیب کے بھائی پی ٹی آئی کے کارکن تھے،انھیں غائب کرکے آج نمودار کیا گیا، ظہور قریشی کو غائب کرکے آج یہاں پیش کیا گیا، اورنگزیب کھچی کو زبردستی غائب کرایا گیا۔

Source link