بالی وڈ اداکارہ ہنسیکا موٹوانی اور ان کے شوہر سہیل کتھوریہ کے درمیان اختلافات اور علیحدگی کی افواہیں سرگرم ہیں لیکن دونوں نے فی الحال اس معاملے پر خاموشی اختیار کررکھی ہے۔
بھارتی میڈیا کے مطابق دونوں 2022 میں رشتہ ازدواج میں منسلک ہوئے تھے لیکن شادی کے 2 سال بعد یہ جوڑا مبینہ طور پر علیحدہ رہ رہا ہے۔
رپورٹ میں بتایا گیا ہے کہ ہنسیکا نے اپنی والدہ کے ساتھ رہائش اختیار کر لی ہے اور سہیل اپنے والدین کے ساتھ مقیم ہیں۔
بھارتی میڈیا نے اپنی رپورٹ میں یہ بھی بتایا کہ شادی کے بعد ہنسیکا اپنے شوہر سہیل کے والدین کے گھر رہائش پذیر تھیں لیکن خاندان بڑا ہونے کی وجہ سے ان کو وہاں رہنے میں مسائل کا سامنا تھا جس کے بعد دونوں نے اسی عمارت میں ایک علیحدہ فلیٹ لیا تھا۔
علیحدہ رہائش کے باوجود دونوں میں مسائل رہے جس کے نتیجے میں دونوں نے علیحدہ رہنے کا فیصلہ کیا۔
بعدازاں جب بھارتی میڈیا نے سہیل سے رابطہ کیا تو انہوں نے ان افواہوں کو جھوٹا قرار دے دیا۔
دوسری جانب ہنسیکا کی طرف سے کسی قسم کا تبصرہ یا رد عمل نہیں دیا گیا۔
سوشل میڈیا صارفین نے دونوں کی علیحدگی کی خبروں پر مختلف تبصرے کیے، بھارتی صارفین کے مطابق ہنسیکا نے اپنی بیسٹ فرینڈ رِنکی بجاج کو دھوکا دے کر اس کے شوہر سہیل کتھوریہ سے مبینہ تعلقات کے بعد شادی کی تھی۔
پنک ولا کی رپورٹ کے مطابق ہنسیکا نے اپنے انسٹاگرام اکاؤنٹ سے شادی کی تمام پوسٹیں ہٹا دی ہیں۔
ہنسیکا کو رِنکی اور سہیل کی شادی میں ناچتے گاتے دیکھا تھا، بعدازاں جب ہنسیکا نے سہیل سے منگنی اور شادی کا اعلان کیا تو صارفین نے الزام عائد کیا کہ اداکارہ نے اپنی بہترین دوست کا گھر خراب کرکے اس کے شوہر سے شادی کی۔
الزامات پر ہنسیکا کا ردعمل
دوست کے شوہر سے شادی کرنے کی خبروں پر ہنسیکا موٹوانی نے ردعمل دیتے ہوئے کہا تھا کہ صرف اس لیے کہ میں اس شخص کو جانتی تھی اس کا مطلب یہ نہیں کہ میری غلطی تھی، میرا ان دونوں کا رشتہ ختم ہونے سے کوئی تعلق نہیں ہے۔
اداکارہ کا کہنا تھا کہ میں ایک سلیبریٹی ہوں، اس لیے لوگوں کی جانب سے مجھے ولن بنانا اور قصوروار ٹھہرانا بہت آسان ہے، یہ وہ قیمت ہے جو مجھے ایک مشہور شخصیت ہونے کے لیے ادا کرنی پڑتی ہے۔
Leave a Reply