اسلام آباد: ترجمان دفتر خارجہ نے کہا ہےکہ بھارت کا اپنی ٹیم کوپاکستان آنےنہ دینا اور پاکستانی ٹیم کوبھارت میں کھیلنےسے روکنا افسوسناک ہے۔
اسلام آباد میں پریس بریفنگ دیتے ہوئے ترجمان دفتر خارجہ نے کہا کہ بھارت نےاپنی ٹیم کو پاکستان کے خلاف نیوٹرل وینیو پر کھیلنے کی اجازت دی ہے۔
انہوں نے کہ بھارتی ٹیم کوپاکستان آنے نہ دینا اورپاکستانی ٹیم کوبھارت میں کھیلنے سے روکنا افسوسناک ہے، پاکستان کا مؤقف ہے کہ کھیل اور سیاست کو آپس میں نہیں ملانا چاہیے۔
اسلام آباد میں افغان طالبان مخالف عناصر کی کانفرنس میں شرکت کے سوال پر ترجمان دفتر خارجہ نے کہا کہ پاکستان میں طالبان مخالف افراد کی کانفرنس ایک تھنک ٹینک کی سرگرمی ہے، پاکستانی حکومت اس کانفرنس کی میزبان نہیں، صرف ایک تھنک ٹینک نے دعوت دی، اسے پاکستان کی سرکاری پالیسی سے جوڑنا درست نہیں۔
ترجمان کا کہنا تھا کہ تھنک ٹینک کی سرگرمیاں کھلےعام ہوتی ہیں، پسِ پردہ کوئی خفیہ اجلاس نہیں ہوا، یہ پہلی بارہے کہ چار برسوں بعد ایسی سرگرمی میں یہ لوگ پاکستان آئے ہیں، شرکا نے ویزا لے کر سفر کیا اور اوپن فورم میں شرکت کی، سوشل میڈیا پر اس معاملے کو بلاوجہ سنسنی خیز بنایا گیا۔
Leave a Reply