بھارتی ریاست اترپردیش میں بچوں کےساتھ جنسی استحصال کرکے ان کی تصاویر اور ویڈیوز ڈارک ویب پر47 ممالک میں فروخت کرنےوالے جوڑے کو سزائےموت سنادی گئی۔
بھارتی میڈیا کےمطابق مجرم میاں بیوی پر 10 سال کےعرصے میں 33 کم عمر لڑکوں کے ساتھ جنسی استحصال کا جرم ثابت ہونے پر سزا سنائی گئی۔
متاثرین میں 3 سال تک کے بچے بھی شامل ہیں۔ رپورٹ کے مطابق مجرمان بچوں کو آن لائن ویڈیو گیمز، پیسے اور تحفوں کا لالچ دےکر قابو میں کرتے تھے۔
بھارتی میڈیا کے مطابق بچوں سے جنسی استحصال کی ویڈیوز اور تصاویر ڈارک ویب پر47 ممالک میں فروخت کی گئیں۔
عدالتی فیصلے کے مطابق مجرمان نے متاثرہ بچوں پر شدید جسمانی اور نفسیاتی تشدد کیا جس کے باعث بعض بچوں کو اسپتال میں داخل کرانا پڑا جب کہ چند بچوں میں مستقل جسمانی پیچیدگیاں بھی پیدا ہوئیں۔
پولیس تحقیقات کے مطابق یہ گھناؤنی کارروائیاں 2010 سے 2020 کے دوران کی گئیں۔
اس نیٹ ورک کا انکشاف اس وقت ہوا جب انٹرپول نے ڈارک ویب پر بچوں سے متعلق غیر قانونی مواد کی تحقیقات کے دوران بھارتی تحقیقاتی ایجنسی سی بی آئی کو اس کی اطلاع دی۔ دونوں کے خلاف اکتوبر 2020 میں مقدمہ درج کیا گیا تھا۔
عدالت نے اتر پردیش حکومت اور متعلقہ محکموں کو ہدایت کی ہےکہ متاثرہ بچوں کی بحالی، نفسیاتی علاج اور محفوظ مستقبل کو یقینی بنایا جائے اور متاثرین کے اہل خانہ کو فی کس 10 لاکھ روپے مالی امداد بھی فراہم کی جائے۔
Leave a Reply